Dështon këtë javë mbledhja e “non-gratave” me dezertorët e Lulzim Bashës, Bardhi qejfmbetur nga Berisha pas refuzimit të postit të Sekretarit të “Foltores”

Krisen raportet mes Sali Berishës dhe Gazment Bardhit. Ndonëse javët e fundit e kanë shfaqur hapur aleancën e tyre opozitare, disfata që korrën në zgjedhjet e parakohshme lokale të mbajtura këtë të dielë në Kukës dhe pazaret për ofiqe brenda “Foltores”, duket se kanë krisur marrëdhëniet mes tyre. Edhe pse të gjithë prisnin që Berisha dhe Bardhi të mbanin mbledhjen e përjavshme me deputetët që u janë bashkuar çetës së tyre anti-amerikane, nuk ka ndodhur aspak kështu. Mbledhja e “non gratave” me dezertorët e Lulzim Bashës dhe lakenjtë e Berishës nuk është mbajtur këtë javë, teksa gazeta “SOT” ka mësuar se dy janë arsyet madhore që detyruan dy krerët e çetës anti-amerikane të refuzojnë të ulen në tryezën e përjavshme me bedelët e tyre. Mësohet se arsyeja e parë ka të bëjë me zgjedhjet në Bashkinë e Kukësit, ku kandidati Emri Vata që mori “bekimin” e Bardhit dhe Berishës humbi turpshëm përballë rivalit socialist, Albert Halilaj me plot 5500 vota diferencë. Pra, s’duket ky rezultat i turpshëm ka bërë që Berisha dhe Bardhit të mos thërrasin mbledhjen e radhës së çetës së tyre, për shkak se nuk duan t’i vënë fytyrën humbjes se Kukësit. Ndërkohë arsyeja tjetër, që ish-kryeministri dhe deputeti Gazment Bardhi nuk thirrën mbledhjen këtë javë, duke i lënë demokratët që i mbështetshin në pritje, mësohet ka të bëjë me refuzimin që Sali Berisha i bëri Judës së Lulzim Bashës, duke mos i dhënë postin e Sekretarit të Përgjithshëm të “Foltores”, post në të cilin plaku “non-grata” ka emëruar Flamur Nokën. Megjithatë mbetet të shihet në ditët në vijim se çfarë do të ndodhë me raportet e dy “miqve” Bardhi-Berisha, të cilët më parë kanë qenë “armiq”, të cilët shkuan deri atje sa e akuzuan njëri-tjetrin si të përfshirë në vrasje.

Reagon Berisha

Por sa i takon humbjes së turpshme që korri në zgjedhjet në Kukës, kreu i “Foltores”, Sali Berisha ka reaguar dje gjatë konferencës së përjavshme për shtyp para gazetarëve, teksa nuk ka pranuara disfatën. Berisha theksoi se zgjedhjet u blenë. Sipas Berishës, ministri Taulant Bala dhe Belina Balluku shpërndanë para 1 javë rresht para 24 shtatorit. “Në Kukës, siç kam referuar këtu për të gjitha, zgjedhjet u blenë në mënyrën më të pamëshirshme. Belinda Balluku, Taulant Balla, janë marrë me shpërndarje parash 1 javë rresht me thasë në qarkun e Kukësit. Në Kukës nuk përcaktoi rezultatin vota e qytetarëve, por rezultatin e përcaktoi qartësisht industria e blerjes së votës. Ne kemi një konkluzion, se me Edi Ramën, zgjedhje nuk ka. Kukësi ishte një argument shtesë në morinë e pafundme të fakteve që kemi paraqitur dhe disponojmë. Edhe të tjera. Por në një vend ku drejtësia është në kontroll total, nuk ka asnjë shpresë dhe zgjidhje tjetër përveç revoltave, protestave dhe përmbysjes së kësaj qeverie. Që në muajin prill, në një lokal në Kukës, janë ulur fatkeqësisht një zyrtar shumë i lartë i PS me drejtorin e OSHEE të qarkut. Tavolina ka pasur përgjues dhe në këtë përgjim është e regjistruar se është bërë pazari që drejtori i OSHEE do të bëjë një tender me kaq miliona lekë, nga të cilat 300 mijë euro do i dërgojë në Tropojë. 200 mijë në Kukës. Shtyllat do vendoseshin në Has. Dhe resti i kësaj në Durrës. Shërbimi informativ, që ka qenë institucioni që ka vendosur përgjuesin, përgjimin ia ka sjellë Edi Ramës. Nuk kam, se nuk do e akuzoja sot SPAK-un, nuk kam të dhëna se Rama e ka çuar në SPAK përgjimin, por sipas disa indiceve e mbajnë aty për të mbajtur peng zyrtarin”, u shpreh ai. Ndërkohë Berisha bëri thirrje për protesta kundër qeverisë. “Nuk është vetëm kjo, nga institucioni i akuzës së Gjirokastrës, është dërguar në SPAK dosja me përgjimin, në të cilin kryetari i Bashkisë së Gjirokastrës, në një mbledhje urdhëron vartësit dhe u thotë: do u japësh kaq lekë, ti do i premtosh këtë vend pune. Pra, bën haptas ofertat për votat që do blinin. SPAK e mbyll dosjen dhe nuk ndërmerr asnjë veprim. SPAK nuk mund të ndërmarrë veprime kur ka dosjen e kriminelëve elektoralë Edi Rama, Damian Gjiknuri, Ulsi Manja. Pra, çfarë mbetet? Mbetet të flasin qytetarët. Përgjegjësia është një: që duhet ngritur sa më shpejt në protesta”, nënvizoi Berisha.