“Detyrim paraqitjeje” për Ilir Beqajn, Nisma “Thurja”: SPAK t’i shkojë deri në fund hetimit për koncesionin e ‘Sterilizimit’, kostot të fryra

Gjykata e Posaçme (GJKKO) ka dhënë masën detyrim paraqitjeje për ish-ministrin e Shëndetësisë, Ilir Beqaj, për koncesionin e sterilizimit, ndërsa në burg që prej muajit gusht 2023 ndodhen ish/zëvendësministri i Shëndetësisë Klodian Rrjepaj, biznesmeni Ilir Rrapaj. Lidhur më këtë dje, në një intervistë televizive, Pano Soko nga Nisma “Thurje” tha se SPAK duhet t’i shkojë deri në fund këtij hetimi. Soko theksoi, se procesi nuk duhet të zvarritet në mënyrë që të shpëtohen sa më shumë para nga koncesioni i sterilizimit. “Procesim më i gjatë që ka pas SPAK, gati 4 vjet. Pse është i rëndësishëm të mbyllet sa më shpejt hetimi. Që të mund të arrijmë të shpëtojmë sa më shumë para nga pezullimi i punës së koncesionit. Sot që flasim është akoma aktiv. Nuk kemi një vendim të formës së prerë për pezullimin e punës. Janë fryrë kostot, 500 lekë një shishe ujë. Ai ka përdorur 500 lekë për ujin. Ato 450 lekët e tjera ku i kanë çuar, kanë vajtur jo vetëm te pronari i koncesionit, nëse gjurmo paratë nga llogaria në llogari, këto para pikën fundore e kanë pasur tek ata që kanë dhënë miratimin”, deklaroi ai. Më tej Soko theksoi se kostot në koncesionin e sterilizimit janë të fryra në krahasim me kohën kur ky proces zhvillohej nga vetë shteti.“Fakt që sterilizimi në vetvete ka qenë aplikuar dhe më parë. Kostot që aplikoheshin para dhënies me koncesion, shkonin 250 mijë euro në vit. Mund të ketë pasur problematika, por ka pasur. Me futjen në fuqi të kontratës koncesionare arritën rreth 17 mln euro. Shtysa e dytë, pagesa për mjetet spitalore ishin të kufizuara. Shumë spitale filluan të refuzonin bërjen e operacioneve për shkak të mungesës së buxhetit për të paguar koncesionarin”, nënvizoi Soko.