Dhuroi dy respiratorë dhe një pajisje dialize në spitalin COVID 2, ish-deputeti tregon se ku i mori paratë dhe jep mesazhin e rëndësishëm

Ish-deputeti i PD, Agron Shehaj ka dhuruar 2 pajisje respiratorë dhe një pajisje dialize për t’iu ardhur në ndihmë pacientëve me COVID-19 të shtruar në spitalin ‘Shefqet Ndroqi’. Me anë të një reagimi lidhur me këtë veprim human vetë Shehaj ka zbuluar se një pjesë të parave e mori nga të ardhurat që i dërguan qindra qytetarë në përgjigje të fushatës së tij rreth një muaj më parë për të mbledhur fonde për spitalet.

Postimi i Shehajt

Një pjesë të kostos për blerjen e njërës nga tre pajisjet e dhuruara Spitalit Shefqet Ndroqi, u mbulua me rreth €13600 euro që qindra shqiptarë më dërguan në përgjigje të fushatës sime, të para një muaji, për të mbledhur ndihma për spitalet tona.

Ju falenderoj të gjithëve nga zemra dhe jam krenar për shpirtin tuaj të bujarisë dhe mirësisë. Ne kemi nevojë të mbështesim njëri-tjetrin në këto kohë të vështira. Vendet e varfëra si i yni kanë më shumë nevojë se vendet e zhvilluara për solidaritet njerëzor.

Dua të falenderoj mbi të gjitha të gjithë mjekët shqiptarë që po bëjnë një punë heroike për të shpëtuar jetët tona.

Miqësisht dua t’u bëj thirrje të gjithëve bashkëatdhetarëve, nisur edhe nga përvoja ime në Itali: tregohuni të kujdesshëm për të mbrojtur veten, Covid kthehet në një sëmundje të rrezikshme nëse injorohet në momentet e para. Le të mbrojmë veten, familjet dhe Shqipërinë!