Dorëheqja e Naços, Petro Koçi: S'do ketë më largime. Kokëdhima: Veprim normal, Rama-Meta politikanë të përgjegjshëm

Dorëheqja e Nasip Naços nga Ministria e Drejtësisë vazhdon të komentohet nga politikanët në vend.

 

Zëvendësministri i Mbrojtjes, Petro Koçi, ka folur sot nga qyteti i Korçës, duke theksuar se nuk do të ketë largime të tjera nga kabineti qeveritar.

 

Sipas tij, largimi i Naços ka qenë për arsye personale.

 

"Largimi i Naços për arsye personale. Nuk do të ketë largime të tjera në kabinetin qeveritar", është shprehur Koçi.

 

Një tjetër koment ka ardhur nga qyteti i Vlorës, përkatësisht nga deputeti i majtë, Koço Kokëdhima, i cili e ka quajtur vendimin e Naços një vendim normal.

 

"Është një veprim normal në jetën politike të vendit. Akte të tilla kanë ndodhur dhe do të ndodhin. Qeveria është në efiçencë të plotë. Rama dhe Meta janë politikanë të përgjegjshëm", ka thënë Kokëdhima.