Fatos Klosi: Sali Berisha për 30 vjet i ka rrahur të gjithë, goditja që mori në fytyrë sfumoi Samitin

Ish-kreu i Shërbimit Informativ, Fatos Klosi, ka komentuar goditjen që Sali Berisha mori në protestën e 6 dhjetorit. Sipas Fatos Klosit, sulmi duhet dënuar, por shtoi se Berisha gjithë jetën e tij politike ka bërë të njëjtën gjë. Sipas tij, ai ka rrahur dhe dhunuar të gjithë rivalët e tij politikë, teksa ka përmendur dhunën ndaj Imamit, Ramës, Legisit. Po ashtu ka përmendur dhe arrestimin e Fatos Nanos. “Berisha i ka rrahur të gjithë, Servet Pëllumbin, Arben Imamin, Ndre Legisin, Edi Ramën e bëri për spital. Nanon nuk e rrahu, por e futi në burg. Nuk kishte vend për trazira. Ishte një ngjarje që ndodhi me Berishën i rrethuar nga një numër i madh badigardësh. Më vjen keq që ndodhi. Ai korri atë që mbolli. 30 vjet e ka bërë këtë gjë. Ky ishte një incident që ndodhi papritur”, tha ai në një studio televizive. Më tej ai hodhi poshtë mundësinë që një ngjarje e tillë të çonte në trazira. Sipas Klosit, e vetmja gjë që solli ngjarja ishte se sfumoi Samitin e BE. “Nuk është më aq kollaj të bëhen veprime të tilla për të përfituar. Mediat u morën me Berishën dhe e harruan Samitin”, shtoi ai. Më tej ai u ndal dhe te aleanca mes Metës dhe Berishës, por edhe te qëndrimet e ish-presidentit për sulmin fizik ndaj ish-kryeministrit. Klosi ka “shpërthyer” në akuza ndaj Metës, pasi sipas tij ikën nga një parti në tjetrën. Kujtojmë se Gerti Shehu, 31- vjeç sulmoi kreun e Foltores Sali Berisha, teksa ky i fundit ishte duke marshuar drejt bulevardit “Dëshmorët e Kombit” për të marrë pjesë në protestë. 31-vjeçari goditi me grusht në fytyrë Berishën duke e gjakosur. Ai u ndalua menjëherë nga truprojat e Berishës dhe ndërkohë u dhunua nga mbështetës dhe simpatizantë të PD-së. 31-vjeçari u shoqërua nga policia dhe aktualisht po merr mjekim në spitalin e Traumës, pasi ka dëmtime në fytyrë dhe fraktura në hundë. Oficerët kanë tentuar dy herë për të marrë në pyetje të riun, por për shkak të gjendjes së tij shëndetësore, ai nuk ka dhënë deri tani asnjë dëshmi. Dyshohet se 31-vjeçari vuan nga probleme të shëndetit mendor.