Fitoi zgjedhjet në Has, KQZ dërgon për verifikim Miftar Dautin në Prokurorinë e Përgjithshme, pretendohet se ka fshehur 2 dënime, ja 2 incidentet para 14 majit

Miftar Dauti, fituesi i zgjedhjeve lokale në bashkinë e Hasit, nga radhët e koalicionit “Foltore”-Parti e Lirisë (Bashkë Fitojmë) rrezikon të mos e gëzojë mandatin e kryebashkiakut. Kjo pasi Komisioni Qendror i Zgjedhjeve vendosi të dërgonte për verifikim të thelluar dosjen e tij në Prokuorinë e Përgjithshme. Dauti dyshohet se ka shkelur ligjin e dekriminalizimit, duke fshehur dënime të marra në Kosovë dhe Serbi. Nëse kjo rezulton e vërtetë, ai mund të bëhet kryebashkiaku i parë që mund të “digjet” pas këtyre zgjedhjeve.  Dauti u bë i njohur në media për 2 raste. Para zgjedhjeve lokale të 14 majit, ai u përplas me djalin e kandidatit rival të PS, Beqir  Mulaj, pasi e kapi duke shpërndarë ushqime me furgon. Shtabi elektoral i Dautit këmbënguli se socialistët po tentonin të blinin vota në favor të Beqir Mulajt. Ky i fundit u justifikua se i biri u ndodh rastësisht në atë vend. Në 19 prill, ai u përplas me vajzën e Mulajt, Entiola Mulaj, e cila ushtron detyrën e Përgjegjëse pranë Zyrës së OSSH-së në Has. Ai e filmoi Mulajn duke verifikuar punimet në rrugë. Dauti akuzoi 28-vjeçaren se pushteti lokal i drejtuar nga socialistët po rregullonte rrugët në prag të zgjedhjeve, në mënyrë që të fitonte sërish bashkinë. Mulaj u konfliktua me Dautin dhe e kallëzoi më pas në polici. “A ke vajzë more, a ke grua? Unë po punoj dhe do i shërbej popullit, po ti ske moral, s’njef emër. Të kesh turp, veç burrni hasjani nuk është kjo! Hyp në makinë, të kesh turp për këtë që po bën”, replikoi Entiola Mulaj me Miftar Dautin. Ky i fundit u procedua penalisht me S. D., 43 vjeç dhe F. D., 52 vjeç, nga e bija e rivalit të tij Beqir Mulaj dhe elektricisti i Krumës I.A. për veprat penale “Kanosja” dhe “Kundërshtimi i punonjësit që kryen një detyrë shtetërore ose një shërbim publik”. Në zgjedhjet lokale të 14 majit, Dauti arriti të fitojë Bashkinë e Hasit, me 4422 vota, kurse rivali i tij nga Partia Socialiste, Beqir Mulaj mori 3488 vota.