“Foltorja” kallëzon PS në SPAK për “Aktivistin”, prokuroria kërkon të jepet me postë, Bylykbashi: Ky është skandal më i rëndë se patronazhistët

Deputeti demokrat i “Foltores”, Oerd Bylykbashi shkoi dje në SPAK për të kallëzuar kupolën e Partisë Socialiste për aktivizimin e aplikacionit “Aktivisti”, të cilin e konsideron kriminal dhe në shkelje të lirisë së votës. Megjithatë, organi i akuzës kërkoi që ky kallëzim të dërgohej me postë. Për mediat, Bylykbashi tha se ky skandal është më i rëndë se rasti i patronazhistëve të PS në zgjedhjet parlamentare të 25 prillit 2021. ”Për fat të keq, SPAK nuk e mori në dorëzim. Kanë vendosur procedura burokratike. Ne do ta çojmë përpara këtë kallëzim. Ka të bëjë me kontrollin e zgjedhësve, me një kontroll sistematik, me një plan kriminal që ka burimin drejtpërdrejt nga kryeministri, nga Këshilli i Ministrave, i shtrirë në të gjithë administratën. I bie barra këtij institucioni të krijojë një situatë ku ndoshta zgjedhësit të kenë besim në një proces zgjedhor të brutalizuar. Është cenuar sekreti dhe liria e votës. Përdorimi i këtij aplikacioni kriminal është shumë më keq se patronazhistët”, tha Bylykbashi. Opozita dhe shumë media akuzojnë kryeministrin Edi Rama dhe vartësit e tij se po kërkojnë të deformojnë zgjedhjet lokale të 14 majit duke ushtruar presion administratës publike për të siguruar sa më shumë vota për kandidatët socialistë. Vetë Rama dhe eksponentë të tjerë të PS e kanë mbrojtur këtë aplikacion. Për “Aktivistin”, Sekretari për Çështjet Dixhitale në PS, Etjen Xhafaj paralajmëroi se do të organizohet një tur në Shqipëri për të shpjeguar përdorimin e tij.