Gazetarët protestojnë para Kryeministrisë, reporterët "qepin" gojën dhe i bëjnë thirrje Ramës të heqë dorë nga “riedukimi”

Gazetarët dolën ditën e djeshme në protestë para Kryeministrisë, fiks në orën 19:00, ashtu siç edhe e paralajmëruan. Të gjithë kishin mbuluar gojën me ngjitës të zi, si një mesazh që po u mohohej e drejta e fjalës. Të grumbulluar para Kryeministrisë me pankarta në duar, ata kanë kërkuar nga numri një i mazhorancës, Edi Rama që të heqë dorë nga masa “ndëshkuese” që ai ndërmerr ndaj gazetarëve që i bëjnë pyetje që nuk i pëlqejnë. Sipas tyre, duhet një reagim masiv në mënyrë që gazetarët të mos aktivizojnë “autocensurën”. “Rastet e fundit ku kryeministri ka çuar në riedukim dy kolegët tanë, nuk duam që të kthehet si koncept (riedukimi). Kryeministri nuk është ai që bën vlerësimin e pyetjeve të gazetarëve. Raste të tilla në botë ndodhin në vende që kanë prirje autokratike. Vit pas viti shikojmë që liria e medias humb vende. Ndodhitë janë të përditshme. Kryeministri të heq dorë nga këto metodat. Ku do shkojmë kështu? Kjo kthen vetëcensurën, kjo është më e rrezikshme se censura”, deklaroi një gazetar.

 “Safe Journalists” merr në mbrojtje gazetarët

Ndërkohë edhe rrjeti i Gazetarëve të Sigurt, i cili vepron në Prishtinë, Shkup, Sarajevë, Zagreb, Beograd, Podgoricë dhe Tiranë, ka reaguar lidhur me qëndrimin që Edi Rama mbajti ndaj gazetarit të A2CNN Klevin Muka. Në një deklaratë rrjeti shpreh shqetësim se çdo sulm ndaj gazetarëve është sulm ndaj interesit publik, demokracisë dhe të drejtave të të gjithë qytetarëve. Përfaqësuesja e Rrjetit të Gazetarëve të Sigurt në Shqipëri, Blerjana Bino shpjegoi se është hera e dytë që Rama vepron në këtë formë me gazetarët gjatë konferencave për shtyp kur nuk i pëlqen pyetja. “Kryeministri ia mohoi gazetarit të drejtën për të marrë një përgjigje adekuate për një pyetje me interes publik. Pyetja e Kelvinit, nëse do t'i jepej përgjigje, do t'i kishte lënë ministres Xhaçka dhe kryeministrit një dritare për të hedhur dritë mbi çështjen e konfliktit të interesit dhe do t'i jepte publikut më shumë transparencë për çështjen në fjalë. Në vend të kësaj edhe një herë tjetër, kryeministri zgjodhi arrogancën ndaj transparencës dhe mbylljen e derës për gazetarët, veçanërisht ata të mirë”, deklaroi ajo për këtë rast. Po ashtu, Bino shprehu shqetësim edhe për mungesën e solidaritetit të gazetarëve gjatë konferencës. “Megjithatë, tani komuniteti i medias dhe organizatat e pavarura dhe OSHC-të po mblidhen krah Klevin në një përpjekje për të mbështetur gazetarinë kritike dhe cilësore të pavarur. Na duhet patjetër më shumë solidaritet mes gazetarëve në Shqipëri dhe aleanca më të gjera për lirinë e medias”, nënvizoi Bino. Çdo sulm ndaj gazetarëve është sulm ndaj interesit publik, demokracisë dhe të drejtave të të gjithë qytetarëve.

Përplasjet e Ramës me gazetarët

Rasti i fundit të përplasjes së Ramës, ndodhi me gazetarin e A2CNN, Klevin Muka. Debati ndodhi gjatë konferencës së kryeministrit Rama dhe ministres së Punëve të Jashtme, Olta Xhaçka. Gazetari Muka pyeti ministren në lidhje me kodit etik të miratuar ku ministrave nuk u lejohet të takohen me biznesmenë pa praninë e dy zyrtarëve shtetërore, ndërkohë që bashkëshorti i ministres është shpallur investitor strategjik. Përgjigjen ia dha kryeministri, i cili u shpreh se do e dërgonte 3 muaj në “riedukim” duke i kujtuar dhe rastin e gazetares së Syri Tv Ambrozia Meta. Disa muaj më parë, kryeministri shpalli të padëshiruar gazetaren e Syri Tv, Ambrozia Meta. Pyetja e gazetares se a ishte PS duke krijuar një grup të mirëfilltë parlamentar brenda burgut në kohën e arrestimeve për hetimin e inceneratorëve. Gazetarja qëndroi 90 ditë e përjashtuar nga çdo aktivitet ku merrte pjesë kryeministri.  Ndërsa vetë Rama në një reagim në rrjetet sociale shkruante se nuk do të lejojë askënd që të shkelë normat etike në praninë e tij. Ai ka paralajmëruar përsëri gazetarët të cilët i bëjnë pyetje, që sipas tij, konsiderohen jashtë normave të etikës se nuk janë mirëseardhur në konferenca për mediat.