“Gjendja është e rëndë”, Presidenti Meta del me thirrjen urgjente: Duhet reflektim i menjëhershëm!

Presidenti Ilir Meta ka ngritur sot alarmin përmes një postimi në rrjetet sociale se gjendja në vendin tonë është e rëndë për shkak të rritjes së borxhit publik. Meta bën thirrje për një reflektim të menjëhershëm.

Postimi i plotë:

BORXHI PUBLIK NË MAJË, POR PROSPERITETI PËRTOKË!

Futesh në borxh për t'u përmirësuar dhe jo për t'u përkeqësuar! Në të kundërt ndodh me vendin tonë.

Sipas Indeksit të Prosperitetit, të përgatitur nga Legatum Institute, institucion i pavarur prestigjoz i përpunimit të statistikave që vijnë nga burime të besueshme, rezulton se vetëm brenda dy viteve të fundit Shqipëria ka përkeqësuar me tre shkallë treguesin e prosperitetit, duke rënë në vendin e 69-të për vitin 2021, nga vendi i 66-të, që ndodhej në 2019.

Në terma konkretë, qëndrueshmëria fiskale, dinamizmi ekonomik, fuqia punëtore janë ndër më të ulëtat në Europë.

Në pikiatë rezultojnë cilësia e qeverisjes, e ekonomisë, zbatimi i ligjeve, respektimi i të drejtave të pronësisë, zbatimi i kontratave dhe detyrimeve.

Cilësia e jetës së qytetarëve shqiptarë ka rënë në tërësi dhe pothuajse jemi ndër të fundit në botë për besimin ndaj institucioneve.

Gjendja është e rëndë dhe përkeqësimi nuk ndalet!

Reflektimi i menjëhershëm, efektiv dhe i përgjegjshëm është domosdoshmëri!