Gjiknuri dhe ish-njeriu i Koço Kokëdhimës përgjegjës për anulimin e koncesionit të naftës për “Phoenix”, Puka injoroi kundërshtimet e AKBN

Përgjegjës për prishjen e kontratës në 2017 me “Phoenix Petroleum” është dhe ish-drejtori i “Albpetrolit” Endri Puka. Në prill 2017, ai u mor nën hetim nga Prokuroria e Tiranës për shtetëzimin e vendburimeve të naftës dhe gazit, me akuzën e “Konkurrencës së paligjshme nëpërmjet dhunës”. Atë kohë, Puka nuk pranoi të jepte sqarime pa avokatin e tij. Ai akuzohej gjithashtu se kishte zhvatur puset e koncensionarit në mënyrë arbitrare, duke neglizhuar kërkesën e AKBN-së dhe të Ministrisë së Financave. Për verifikim kaloi dhe ministri i kohës së Industrisë dhe Energjisë, Damian Gjiknuri. Në 27 janar 2018, Puka u shkarkua nga detyra e drejtorit të “Albpetrolit” me justifikimin e ristrukturimit të institucionit në fjalë. Ai u pasua nga Kastriot Bejtaj, i cili mbante postin e Drejtorit Teknik në “Albpetrol”. Endri Puka u emërua në krye të “Albpetrolit” në 2013, pasi socialistët erdhën në pushtet. Ai kishte drejtuar bizneset e ish-deputetit socialist Koço Kokëdhima dhe emërimi i tij në krye të “Albpetrolit” u konsiderua si propozim nga Kokëdhima, i cili në vitet 2013-2017 u bë një nga deputetët e PS më të fuqishëm në vend - Raporti për skandalin me “Albpetrolin”, Puka dhe Gjiknuri falsifikuan bilancet - Në 25 janar 2022, Ministria e Financave dhe Ekonomisë kreu një ekspertim për çështjen e humbjes së 12.5 milionë eurove në Arbitrazh mes shtetit shqiptar dhe kompanisë “GBC Oil”. Ish-drejtori Puka dhe ish-ministri Gjiknuri u akuzuan se kishin fshehur vendimin e arbitrazhit ndërkombëtar të 2020 dhe për më tepër “Albpetrol” kreu akte fiktive dhe kontabilizimi për marrjen në dorëzim të aseteve të “GBC OIL”. Kontabilizimi ka ekzistuar i deklaruar si shifër, por nuk është shoqëruar me fatura dhe depozitimet përkatëse. Bëhet fjalë për një vendim të firmosur nga Endri Puka në vitin 2017, sipas të cilit tre vendburimet e naftës që ishin nën koncesionin e kompanisë amerikane “GBC Oil” do shtetëzoheshin, gjë që çoi në largimin e kompanisë koncesionare. Kontabilizimi i rremë është regjistruar edhe në bilancin e kompanisë “Albpetrol”, ku është bërë shtim kapitali. Por, as Endri Puka dhe as Damian Gjiknuri nuk u morën asnjëherë të pandehur nga drejtësia shqiptare.