Ilir Demalia: Rinia nuk duhet të ndjekë shembullin e “Foltores”, ardhja e Escobar është një mesazh kundër Berishës

Analisti Ilir Demalia dje ka komentuar situatën aktuale brenda Partisë Demokratike si dhe “Foltoren” e ish-kryeministrit Sali Berisha. Ai u shpreh se nëse shqiptarët do të vijojnë ta luftojnë të keqen me të keqe atëherë e keqja do të vijojë të sillet në shoqërinë dhe rrethin tonë. Demalia tha se problemi nuk duhet shtruar tek Rama apo Berisha por tek shoqëria shqiptare dhe rinia e cila ndjek shembullin e “Foltores” pa sjellë një model të ri. Sipas tij, rinia nuk duhet të marrë si mode këtë klasë politike. “Berisha thotë unë e di si mundet Rama ashtu si Rama pati thënë unë e di si mundet Berisha. Dhe çfarë na erdhi? Një Berishë më i keq se Berisha para Ramës me Ramën. Janë antipod i njëri-tjetrit. Nëse shqiptarët do të vazhdojnë të luftojnë të keqën me të keqen do të sillen në rrethin vicioz të keqes. Problemi nuk duhet shtruar Berisha apo Rama por përse shoqëria shqiptare, rinia që shkon pas foltores së Berishës, nuk ka qenë në gjendje të sjellë një model të ri. Rinia po merr modelin e kësaj klase politike. Nuk funksionojnë partitë në Shqipëri si ekip”, tha ai. Po ashtu analisti komentoi edhe vizitën që do të ketë i dërguari i SHBA për Ballkanin Perëndimor, Gabriel Escobar. Demalia tha se kjo vizitë nuk është e rastësishme pasi do të jetë dy ditë para Kuvendit të 11 dhjetorit të organizuar nga Berisha. Ai shpreh se fakti që Escobar do të takojë vetëm Ramën dhe Bashën tregon mesazhin kundër Berishës. Sipas tij kjo vizitë lidhet edhe me vendimin e presidentit të SHBA Joe Biden për sekuestrimin e pronave dhe bllokimin e pasurive që janë mbledhur nga korrupsioni. “Kjo vizitë nuk është thjeshtë një vizitë formale e një prej diplomatëve më të lartë amerikanë, nuk është e rastësishme që vjen dy ditë para zhvillimit të Kuvendit. Po ashtu mendoj se është një mesazh fakti që Escobar nuk takon Berishën por takon Bashën dhe Ramën, tregon se është një mesazh kundër Berishës. Mesazhi kundër Berishës është logjik se DASH e ka në listën e zezë. Lidhet dhe me vendimin e Biden që do të fillojnë shumë shpejt masat për sekuestrimet, bllokimet e pasurive të korrupsionit dhe luftën e pandalshme të korrupsionit në Ballkan”, u shpreh Demalia.