Ilir Meta: Edi Rama porositi ‘atentatin’ ndaj Berishës përmes një aksioni të mirëorganizuar, u rrezikua një përshkallëzim i dhunës, opozita e evitoi

Kreu i Partisë së Lirisë, Ilir Meta ka komentuar zhvillimet e fundit politike. Lidhur me incidentin më 6 dhjetor, Meta tha se kishte një ‘atentat’ të organizuar ndaj Sali Berishës. Meta u shpreh se ka qenë kreu i qeverisë Edi Rama që porositi atentatin ndaj Berishës përmes një “aksioni të mirëorganizuar”. Meta e konsideroi një provokim nga shteti mafias për të përshkallëzuar dhunën që opozita e evitoi. Sipas tij ky ishte një skenar i lexueshëm dhe tashmë i dështuar. Sa i përket 31-vjeçarit Gert Shehu, kryetari i Partisë së Lirisë e cilësoi si të mirëtrajnuar dhe të infiltruar. “Të gjitha të dhënat dhe investigimi i deritanishëm që është bërë për të gjitha rrethanat tregojnë qartë se ishte një akt i mirëorganizuar. Kishte një prapavijë të qartë shtetërore, qeveritare, politike, mediatike etj”, tha Meta, duke e konsideruar goditjen ndaj Berishës si aktin më të rëndë që ka ndodhur ndal pluralizmit politik në këto 32 vite. “I mirëtrajnuar për një akt dhe një veprim të tillë. Ishte i infiltruar në ekipet e mediat që dilnin para drejtuesve të opozitës. Gjithçka ishte e mirëorganizuar”, tha kryetari i Partisë së Lirisë i ftuar në një studio televizive. Ai u shpreh se Rama po e shkatërron Shqipërinë. “Ai po shkatërron Portin ndërkombëtar të Durrësit në mënyrë më arbitrare dhe të paligjshme. Ndoshta juve ju duket sikur është njëlloj si ta godasësh si ta mbështetës Kosovën. Po kilometrat me miliona euro ju duket normale? Këto janë çështje esenciale dhe jo dashurie dhe urrejtje. Çështje që kanë të bëjnë me qytetarët e këtij vendi por me fatin e kësaj shoqërie dhe të këtij shtetit. Qëllimi ynë që shqiptarët të mos ikin me ritme marramendëse dhe të jetë ky shpopullim. Kjo qeveri është arrogante dhe nuk njeh asnjë ligj”, tha Meta. Ish-presidenti tha se opozita është në harmoni të plotë dhe nuk ka ndarje. “Mendoj se protesta u zhvillua. Tregoi se ishte tërësisht paqësore nga ana e opozitës. Pati një jehonë të jashtëzakonshme ndërkombëtare. Zëri i opozitës u dëgjua dhe ky ishte zëri më evropian që erdhi nga Shqipëria më 6 dhjetor. Në opozita nuk ka ndarje. Ka vetëm harmoni”, tha Meta.