Izraeli vlerëson ndërprerjen e marrëdhënieve diplomatike Shqipëri-Iran, Rithemelimi akuza për patronazhistët dhe dështimin me shtetin digjital

Izraeli mbështet vendimin e qeverisë shqiptare për ndërprerjen e marrëdhënieve diplomatike me Republikën Islamike të Iranit pas disa sulmeve radhazi kibernetike në uebsajtet shtetërore shqiptare me direktivë të Teheranit zyrtar. Qëndrimi u shpreh nga zv/ministri për Punët e Jashtme të Izraelit Idan Roll pas një bisede me ministren për Evropën dhe Punët e Jashtme të Shqipërisë, Olta Xhaçka në Konferencën për Formësimin e Politikave të Jashtme Feministe. Zyrtari i lartë izraelit garantoi dhënien e ndihmës nga shteti i tij për rritjen e sigurisë kibernetike të Shqipërisë. Zv/ministri izraelit i konfirmoi këto qëndrime në profilin e tij në “Tëitter”. “Bisedova me Ministren për Evropën dhe Punët e Jashtme të Shqipërisë, Olta Xhaçka në Konferencën për Formësimin e Politikave të Jashtme Feministe. I shpreha vlerësimin e Izraelit për vendimin e Shqipërisë të ndërprerjes së marrëdhënieve diplomatike me Iranin dhe i ofrova njohurinë e përvojën në fushën e mbrojtjes kibernetike. Ne do të vazhdojmë të forcojmë bashkëpunimin midis Izraelit dhe Shqipërisë”, shkruan Idan Roll. Nga ana tjetër, Grupi i Rithemelimit të PD akuzoi qeverinë socialiste se dështoi në krijimin e shtetit digjital duke ndërhyrë paligjshmërisht në të dhënat personale të qytetarëve me patronazhistë, publikimi i të dhënave të pagave, targave të automjeteve, etj., të cilat më pas i ka përdorur për qëllime elektorale, etj. Qëndrimi u dha nga zëdhënësja e Rithemelimit, Floriana Garo. “Duke analizuar këto sulme, të cilat asgjësuan sikur të ishte prej letre, infrastrukturën digjitale të vendit, PD shton se, asgjësimi me kaq lehtësi i kësaj infrastrukture i ka rrënjët në dy faktorë të tjerë madhorë: Së pari, hakerimin e sistemit për qëllime elektorale nga vetë qeveria, duke pajisur 1 milion patronazhistë me të dhënat personale të qytetarëve, të depozituara në e-Albania, në shkelje të Kushtetutës dhe ligjeve të vendit. Pas këtyre, hakerimi me pasoja të rënda i pagave të punonjësve, targave të makinave, të gjitha këto paraprin hakerimin dhe ‘de facto’ asgjësimin e ‘shtetit’ digjital të Edi Ramës”, deklaroi Garo.