“Kam pasur një diskutim me ambasadoren amerikane ...”/ Fatmir Mediu flet për situatën politike brenda partisë: Opozita të dalë me kandidatë të përbashkët. Të bëhen zgjedhje të hapura ose ...

Kreu i Partisë Republikane Fatmir Mediu duke folur në MCN Live theksoi se Shqipëria ka nevojë të bëjë një ligj “screening” për kompanitë e huaja, duke iu referuar influencës ruse dhe kineze në vendin tonë. Mediu vuri në dukje se opozita i ka mundësinë të dalë me kandidatë të përbashkët në zgjedhje. Kreu i PR tha se kjo mund të bëhet me zgjedhje të hapura, që tejkalojnë PD-në, ose përmes sondazheve të institucioneve të besueshme.

Shqipëria nuk është e imunizuar nga influenca e Kinës dhe Rusisë. Ndoshta ka nevojë me një ligj që të bëjë screening për të gjitha kompanitë që vijnë. Kam pasur një diskutim me ambasadoren amerikane dhe besoj që ka nevojë për një paketë të qartë për financimin e partive politike. Më mirë do ishte të kishte financime me burime shtetërore, se sa të padeklaruara. Në Lituani psh. ka ligje për kompanitë dhe ato offshore, si dhe një ligj screening.

Në zgjedhje opozita i ka mundësitë të dalë me kandidatë të përbashkët. Në rast se nuk e kupton që kjo është rruga e vetme për të fituar nuk do ta arrijë qëllimin. Edhe në 6 mars ne kemi propozuar zgjedhje të hapura. Ky është një moment që duhet ta rivlerësojmë. Është plotësisht e mundur. Ose një formulë tjetër, një sondazh nga një instucion kredibël, ndoshta dhe ndërkombëtar që përcakton kush është kandidati më i mirë. E para ka mundësi për të krijuar një raport më të gjallë me votuesin. E dyta është më sempliste dhe më e thjeshtë për t’u realizuar. Nga niveli politik duhet të kalojmë në një nivel diskutimi teknik. Ne duhet të kthehemi në demokraci normale. Nuk ka nevojë Shqipëria për qeverisje autoritare”.
Mediu u shpreh se nuk beson që PD-ja të ketë lidhje me Rusinë, por duhet të bëjë transparencë mbi çështjen.

Unë kam bindjen që PD ka qenë parti me vokacion perëndimor dhe evropian. Jam i bindur që s’ka asgjë që ka të bëjë me financimet ruse. Kam bindjen që Basha s’ka pas të bëjë me raporte me Rusinë. PD duhet ta bëjë transparente këtë çështje. Sa më transparente të jetë PD aq më mirë do ishte për PD-në por edhe individët që akuzohen”.