Kandidati i PD për Tiranën Këlliçi takon qytetarët, akuzon Veliajn për taksat e larta, mungesën e parqeve dhe hapësirave publike në kryeqytet

Kandidati i Partisë Demokratike për Bashkinë e Tiranës, Belind Këlliçi, në vijim të takimeve me banorët e kryeqytetit, u ndal në Njësisë 10, në rrugët “Myslym Shyri“, “Ibrahim Rrugova“ dhe “Rr. Kavajës“  dhe ka dëgjuar shqetësimet e tyre. Sipas diskutimeve të tij me banorët, taksat e larta ishin shqetësimi kryesor i bizneseve në këtë zonë. Ndërsa për sa i përket zënies së hapësirës publike, qytetarët janë të shqetësuar pasi rrugët dhe dyert e bizneseve janë të zëna nga skela ndërtimi. Sipas tyre, varfëria shihet kudo në kryeqytet, edhe në një nga zonat më të lakmuara të Tiranës, ku bizneset e vogla hasin të njëjtat vështirësi si në vendet periferike apo rurale. Këtë e dëshmoi një prej tregtarëve, i cili i pyetur nga kandidati i PD për Tiranën Këlliçi, tha se ka tentuar ta mbyllë disa herë aktiviteti e tij për shkak të borxheve të banorëve. Mungesa e hapësirave publike dhe në veçanti parkimi ishte një nga shqetësimet e vazhdueshme që banorët e zonës i shprehën kandidatit Belind Këlliçi. “Na duhen parqe për fëmijët sepse shkojmë përditë nga liqeni duke kërkuar parking“, tha një qytetar. “Nga ana tjetër e shef atë tjetrin në televizor: Po bëj parqe, po bëj lojra“, ironizoi një tjetër banor. Me anë të takimeve të përditshme dhe bisedave në terren, kandidati i PD për Tiranën Belind Këlliçi po zhvillon një turr dëgjimi në kryeqytet me qëllim që kërkesat specifike t’i dëgjojë nga vetë qytetarët. Ndërkohë, edhe më herët kandidati i PD-së për bashkinë e Tiranës, Belind Këlliçi, ka hedhur akuza ndaj kryebashkiakut Erion Veliaj. Me anë të një statusi në rrjetet sociale, Këlliçi thotë se Veliaj ka gënjyer duke thënë se Tirana është kryeqyteti i sportit për vitin 2023. Sipas tij, për çmimin e sportit, Tirana ka hyrë në konkurrim si qytet dhe jo si kryeqytet.