Kërcet arma mes demokratëve të Berishës në korridoret e selisë, arrestohet autori që gjuajti në takimin e PD-së, zbardhet shkaku që situata degradoi në nxjerrjen e armëve

Një ngjarje e rëndë u shënua mbrëmjen e kaluar në Laç mes demokratëve. Arsyeja e konfliktit të degradimit në përdorimin e armëve të zjarrit ishte kërkesa për anëtarësime të reja të simpatizantëve me qëllim që të merrnin pjesë në votimet për kandidatët e primareve me 4 dhjetor.

Konfliktit u shoqërua edhe më të shtëna me armë zjarri në degën e Partisë Demokratike në Kurbin. Sipas burimeve Van Rica i cili mbështeste kandidatin Edmond Shkoza kishte kërkuar anëtarësimin e disa simpatizantëve, por kjo është kundërshtuar nga nënkryetari i degës së Partisë Demokratike të Rithemelimit Kastriot Marku me pretendimin se kishte përfunduar afati i anëtarësimeve.

Në debat e sipër Van Rica ka qëlluar me armë zjarri pistolete në korridoret e zyrave të Partisë Demokratike dhe më pas është larguar, por fatmirësisht nuk pati persona të lënduar.

Në lidhje me ngjarjen policia ka arrestuar 53-vjeçarin Rica i cili rezulton të jetë punonjës i një policie private në Laç. Ndaj tij janë ngritur akuzat “Mbajtja pa leje e armëve, armëve shpërthyese dhe municionit”, "Kanosja” dhe “Prishja e qetësisë publike”.

Gjithashtu në cilësinë e provës materiale është sekuestruar një armë zjarri pistoletë me të cilën dyshohet të ketë qëlluar anëtare i Partisë Demokratike Van Rica si dhe gëzhojat e gjetura në vendin e ngjarjes. Konflikti ndodhi gjatë një takimi të kandidatëve të primareve me kryesinë e Partisë Demokratike në Kurbin.