Largimi i ambasadores amerikane, reagon ashpër ish-ministri i Drejtësisë: Yuri Kim nuk ka pasur asnjëherë asgjë në dorë, rruga e mbarë i qoftë!

Ministria e Jashtme njoftoi sot se ka nisur procedurat për zëvendësimin e ambasadores së SHBA në Tiranë, Yuri Kim.

Për largimin e ambasadores nga vendi jonë pas tre vitesh, ka reaguar me një status në rrjetet sociale ish-ministri i Drejtësisë, Ylli Manjani.

Ai deklaron se Yuri Kim ishte dhe mbetet prova flagrante e keqpërdorimit të një ambasadori të huaj nga ai që sundon.

Manjani thotë se diplomatja amerikane nuk ka patur asnjëherë asgjë në dorë, thjesht ka bërë çfarë i ka interesuar kryeministrit Edi Rama.

“Pavarësisht motivit që qeveria ka për largimin e përshpejtuar e zonjës Yuri Kim, them me plot gojën që:

Zotin ja luan!

Rruga e mbarë i qoftë!

Nga ana tjetër, ju që na çatë menderen me amerikanllëqe, ja ku e keni provën që qeveria as që e qeth fare për Amerikën. Kur është puna për të marrë vendime, qeveria është krejt e pavarur nga Amerika, pavarësisht se jo e nisur nga sovranizmi.

Është e pavarur nga ambasadat, por jo e motivuar nga populli shqiptar. Ajo motivohet thjesht nga mendimi i një njeriu të vetëm që sundon totalisht në këtë vend.

Kush ka dy pare mend në kokë, sytë në ballë e veshët hapur e kupton qartësisht se problemi ynë i vetëm është ai që sundon.

Ambasadat kur reagojnë reagojnë vetëm kur do ai, jo kur duan ata.

Yuri Kim ishte dhe mbetet prova flagrante e keqpërdorimit të një ambasadori të huaj nga ai që sundon.

Yuri Kim nuk ka patur asnjëherë asgjë në dorë. Thjesht ka bërë ç'i ka interesuar atij... Na doli goja pas duke e thënë këtë gjë, por tani keni dhe provën.

Nejse, hajt udha e mbarë!”, shkruan ai.