Luftë e fortë në PD, Berisha presion delegatëve të tregojnë publikisht mbështetjen ndaj tij, Bardhi akuza për manipulime në Elbasan

Partia Demokratike duket se është mbërthyer nga një betejë e fortë. Qysh kur u përjashtua nga grupi parlamentar demokrat më 9 shtator të këtij viti, ish-kryeministri Sali Berisha i ka shpallur luftë kreut të PD, Lulzim Basha, ku përveç akuzave dhe deklaratave të forta të bëra publikisht, ai po lëviz gurët edhe në prapaskenë, me qëllim fitimin e zemrave të demokratëve në aksionin e nisur prej tij për rrëzimin e kreut të Partisë Demokratike. Gazeta ka mësuar se ditët e fundit Berisha dhe njerëz pranë tij kanë nisur presionet ndaj delegatëve në të gjithë vendin, të cilëve iu kanë kërkuar që të dalin publikisht dhe të tregojnë mbështetjen që ata kanë për ish-liderin e PD. Mësohet se kjo lëvizje e Berishës ka ardhur pas akuzave që kupola e Partisë Demokratike ka hedhur ndaj tij dhe mbështetësve të tij, se kanë manipuluar firmat e delegatëve për thirrjen e Kuvendit Kombëtar të 11 dhjetorit. Kështu që për të shmangur një debat të kësaj natyre dhe thellimin e skandalit, sipas informacioneve nga selia blu, mësohet se ish-lideri demokrat dhe njerëzit e tij kanë po shantazhojnë delegatët, ndërsa kanë kërkuar prej tyre që të dalin dhe përgënjeshtrojnë zërat se firmat për thirrjen e Kuvendit të 11 dhjetorit janë të manipuluara.

Berisha presion delegatëve

Por duket sikur presioni i ushtruar në prapavijë nga ish-kryeministri Sali Berisha dhe mbështetësit e tij ka funksionuar. Sinjalet janë dhënë nga qyteti i Elbasanit, teksa këtë të shtunë Bledi Himçi, Sekretar i degës së Partisë Demokratike në Elbasan, ka dalë nga Selia blu në Tiranë dhe ka lexuar emrat e 272 delegatëve të Kuvendit Kombëtar të PD, të cilët sipas tij, kanë firmosur për Kuvendin e datës 11 dhjetor të kërkuar nga Sali Berisha. Sipas tij, akuzat e kupolës së Partisë Demokratike se janë manipuluar firmat janë mashtrime. “Prej dy javësh hidhet baltë mbi procesin e hedhjes së firmave në Elbasan. Ka qenë një prej proceseve më demokratike”, deklaroi ai. Ndërkohë dje gjatë një prononcimi për mediat zoti Himçi deklaroi se ka pasur transparencë të plotë për firmat e delegatëve për Kuvendin e 11 dhjetorit. Himçi theksoi se 272 delegatë nga 409 do jenë prezent në Kuvendin e 11 dhjetorit. “Është bërë transparencë për firmat e delegatëve. Në listë ishin 409 delegatë. Janë konfirmuar të gjithë personat me telefonata. Të gjithë kanë thënë se kanë firmosur me dëshirë, pa pasur asnjë presion”, nënvizoi Himçi.

Bardhi akuza për manipulime në Elbasan

Megjithatë lidhur me procesin e mbledhjes së firmave për mbledhjen e Kuvendit më 11 dhjetor, duke përmendur edhe rastin ku përfaqësues të PD të Elbasanit lexuan emrat e delegatëve që kanë firmosur, reagoi edhe Sekretari i Përgjithshëm i PD, Gazment Bardhi. Ky i fundit gjatë një prononcimi përmes mediat theksoi se një pjesë e tyre nuk janë delegatë. “Jam informuar për rastin e Elbasanit. Dua të them se një pjesë e tyre nuk janë delegatë  në Kuvendin e PD. Një pjesë tjetër kanë konfirmuar se nuk kanë firmosur por u është lexuar emri. Ky proces është një tallje ndaj demokratëve. Elbasani nuk ka aq anëtarë në Kuvend.  Kam vendosur që jo vetëm të mos bëhem pjesë e një procesi tallje që ka nisur që më 10 nëntor ku firmat u mbyllën në kasafortë e po vazhdon. Kjo lloj tallje me shifra e emra që kërkojnë të bëjnë zhurmë do të marrë përgjigje në Kuvendin e PD më 18 dhjetor”, deklaroi Bardhi.