Lulzim Basha i përgjigjet “flakë për flakë” Berishës: Shpik për të fshehur dështimin që mbolli duke vendosur interesin e tij mbi atë PD

Rikthimi i Lulzim Bashës me thirrjen për të braktisur politikën e vjetër, ku pjesë është edhe Sali Berisha, për kreun e Rithemelimit tregon se ish-kryedemokrati vijon të jetë peng. “Atë po e përdor Rama siç do. Mos bëj shaka. Ai është vegël në duart e Edi Ramës. Ai bën se çfarë i thotë Rama. Mos më pyesni për axhendën e tij, axhendën e tij ia shkruan Rama. Të bëjë ç’të dojë, asnjë lloj interesi nuk kam”, deklaroi dje Berisha para gazetarëve nga oborri i Kuvendit të Shqipërisë. Por i menjëhershëm ka qenë edhe reagimi ish-kryedemokratit Lulzim Basha. Sipas Bashës, Berisha po shpik armiq për të mbuluar dështimin që mbolli duke vendosur interesin e tij mbi atë të demokratëve. “Të kishte sulmuar Ramën aq sa ka sulmuar ata që nuk mendojnë si ai, rezultati nuk do të ishte ky. Por halli i SB është tjetër nga hallet e qytetarëve. Sot si dje ai shpik e kërkon armiq për të fshehur dështimin që mbolli duke vendosur interesin e tij mbi atë të demokratëve”, i është përgjigjur Basha përmes një statusi në rrjetet sociale. Ndërkohë kthimi i ish-kreut të demokratëve, që u largua nga drejtimi pas humbjeve të njëpasnjëshme të zgjedhjeve dhe përplasjes me Sali Berishën, tashmë është temë diskutimi në çdo tavolinë politikanësh. Sipas deputetit Flamur Hoxha, deputetët duhet të tregojnë nëse do të vijojnë që të mbajnë qeverisjen e rilindjes në pushtet apo do t’i shërbejnë demokratëve. Sa i takon rikthimit të Bashës, Hoxha u shpreh se është herët që të flasin për një kryetar partie. “Është e rëndësishme që të flasë çdo deputet. Nëse duna t’i shërbejnë demokratëve apo do të vijojnë që të mbajnë qeverisjen e rilindjes në pushtet. Do ta bëj unë i pari. Duhet të bëjnë të gjithë ato që kanë humbur të gjitha zgjedhjet. Kjo është përgjegjësia. Nëse do të ishim bashkë pas 25 prillit s’do të kishim këtë qeveri në pushtet. Të marrin përgjegjësi deputetë. Lulzim Basha mendoj se është herët të flasim për kryetar partie. Nëse jemi dy parti duhet të shohim. E tregon koha deputetët nëse do të marrin qëndrim për të dalë mbi interesat personale. Nëse në 2 vite kemi thënë se jemi me 2 parti unë nuk po e shoh. Duhet të bashkohemi e pastaj të bëjmë garë për kryetar”, deklaroi dje Hoxha para gazetarëve nga oborri i Kuvendit të Shqipërisë.