"Marrëveshja ishte e suksesshme"/ Varhelyi reagon për lajmin fantastik

Komisioneri për Zgjerm dhe Fqinjësi në Bashkimin Evropian, Oliver Varhelyi ka reaguar pas arritjes së një marrëveshjeje mes Kosovës dhe Serbisë për targat e automjeteve.

Përmes një postimi në rrjetet sociale, Varhelyi u shpreh se marrëveshja, e lehtësuar nga BE, ishte e suksesshme për të shmangur përshkallëzimin e mëtejshëm të situatës në veri.

Ai shtoi se negociatat duhet të vazhdojnë, derisa të arrihet normalizimi i marrëdhënieve mes dy vendeve.

“Mirëpres lajmin se marrëveshja mes Beogradit dhe Prishtinës, e lehtësuar nga Bashkimi Evropian, ishte e suksesshme për të shmangur përshkallëzimin e mëtejshëm. Negociatat duhet të vazhdojnë drejt normalizimit të marrëdhënieve’, shkroi Varhelyi në Twitter.

Kosova dhe Serbia më 23 nëntor në Bruksel kanë arritur marrëveshje për targat ilegale serbe.

Kryediplomati evropian, Josep Borell, ka thënë se Kosova do t’iu japë fund veprimeve të mëtejme të lidhura me riregjistrimin e makinave, derisa Serbia nuk do të lëshojë më targa të makinave me emra të qyteteve të Kosovës.