Mbyllja e kolegjit turk, reagon ashpër Gjekmarkaj dhe i bën thirrje Ramës: Tronditëse! Qeveria duhet të tërhiqet menjëherë nga ky vendim, po cënon të drejtën për arsim

Deputeti Agron Gjekmarkaj, njëkohësisht edhe zv/Kryetar i Kuvendit të Shqipërisë ka reaguar me anë të një postimi në rrjetin e tij social ‘Facebook’, pas vendimit të qeverisë për mbylljen e kolegjit privat “Mehmet Akif” në Tiranë, duke e quajtur “tronditës”.

Në postimin e tij, Gjekmarkaj thotë se kryeministri ‘Edi Rama duhet të tërhiqet nga ky vendim i cili kompromenton sovranitetin tonë dhe cënon të drejtën për arsim të fëmijëve shqiptarë’.

REAGIMI I PLOTE

Lajmi për mbylljen e shkollës “Mehmet Akif” në Tiranë për një sërë arsyesh është tronditës ! Pasi ka filluar viti shkollor qindra fëmijëve u ndërpritet mësimdhënia aty, një goditje kjo e fortë psikologjike për ta familjet e tyre e dhjetëra mësues që punonin në atë institucion.

Kjo vatër dijeje prej mbi 20 vitesh ka krijuar një tradite duke dhënë siguri për një arsim solid të fëmijëve shqiptar.

Nëse kujtojmë momentin kur u hap , kohe kur arsimi shqiptar përballej me krizë të gjithanshme mirënjohja duhej të ishte shtuar.

Studentet e dalë prej aty kanë përballuar universitetet më të mira të Botës me shumë sukses.

Si do të integrohen befas sot ata në sistemin arsimor kur janë mësuar me një tradite të caktuar pedagogjike!? Argumentet e përdoruar për mbylljen e shkollës ishin qesharakë e të sforcuar të cilët të çojnë lehte drejt përfundimit se ai është një vendim politik.

Turqia për ne është një vend mik dhe çdo qeveri shqiptare ka detyrimin që miqësisë ti përgjigjet me miqësi përtej faktit se kush ngjitet apo bie nga pushteti në Ankara.

Turqia ka qenë një vend mik kur kjo shkollë është hapur dhe i kemi falënderuar përzemërsisht po kaq e tillë duhet të mbetet, sot e nesër. Fëmijët shqiptarë , mësuesit e tyre, dinjiteti i ligjeve të vendit, Shqipëria vetë nuk duhet të nëpërkëmben për arsye të konflikteve politike as brenda e aq më pak jashtë Shqipërisë. Shqipëria është vend sovran dhe i pavarur.

Një shkollë që të vazhdojë misionin e saj duhet të respektojë ligjet e vendit, standardet administrative dhe cilësinë e mësimdhënies.

Edi Rama duhet të tërhiqet nga ky vendim i cili kompromenton sovranitetin tonë dhe cenon të drejtën për arsim të fëmijëve shqiptarë.