Mediat serbe zbulojnë prapaskenat: Brukseli dhe Uashingtoni të pakënaqur me Albin Kurtin rreth dialogut Prishtinë-Beograd

Agjencia e lajmeve serbe “Beta” shkruan se nga burimet e tyre në Bruksel, BE dhe ShBA janë “tejet të pakënaqur” me kryeministrin e Kosovës, Albin Kurti, dhe se atij i faturohet faji për “pengimin” e dialogut. Pavarësisht presioneve të ushtruara edhe nga zyrtarë të Shteteve të Bashkuara, sipas kësaj agjencie lajmesh, Kurti megjithatë ka refuzuar “të dorëzohet”. “Zyrtarët në institucionet e BE-së dhe të shteteve anëtare kërkojnë që autoritetet e Kosovës në mënyrë substanciale të rinisë dialogun me Beogradin, dhe e bëjnë tejet të qartë që as Serbia e as Kosova nuk mund të bëjnë progres drejt integrimeve në BE pa progres të prekshëm në normalizimin e marrëdhënieve në formën e një marrëveshje gjithëpërfshirëse dhe ndërkombëtarisht të njohur”, tha agjencia e lajmeve serbe “Beta” se kanë mësuar nga burime diplomatike evropiane. Në artikull shkruhet se “institucionet e BE-së dhe qeveritë evropiane janë tejet të pakënaqur me Kryeministrin Albin Kurti, i cili pavarësisht të gjitha arsyeve të deklaruara, në mënyrë këmbëngulëse refuzon të pranojë rinimin e marrëveshjeve të arritura në dialog”. Më tej “Beta” thotë se burimet e tyre në Bruksel u kanë thënë se “edhe pse zyrtarët amerikanë i kanë bërë shumë presion, Kurti nuk dorëzohet”. “Tani edhe BE edhe Uashington-u kanë ardhur në përfundim që Kurti është ai që po e pengon dialogun”, thotë mes tjerash kjo media. Sipas saj, dialogu Kosovë-Serbi ka qenë në ngërç për një kohë të gjatë ndërsa veçanërisht karakteri i saj ka ndërruar në mënyrë drastike me ardhjen në krye të qeverisë së Kosovës, Albin Kurti.