Mediu: Opozitës i duhet një lidership i ri, marrëdhëniet me SHBA-të janë delikate

Kryetari i Partisë Republikane dhe aleati i Partisë Demokratike, Fatmir Mediu la të kuptohej se PD dhe opozita kanë nevojë për një lidership të ri. Ai dha këtë qëndrim në një studio televizive duke theksuar se opozita dhe SHBA kanë raport shumë delikat mes tyre, i cili është përkeqësuar që prej 9 shtatorit 2021 kur ish-kreu i PD, Lulzim Basha përjashtoi nga grupi parlamentar demokrat Sali Berishën për shkak të “non gratës” nga Uashingtoni. Mediu mirëpriti opsionin që PD dhe opozita të kenë në krye figura të reja. “Berisha është një eksponent që lidhet fort me njerëzit në bazë. Ai ka qenë nga ata që i ka njohur njerëzit dhe strukturat thuajse me emra. Për sa i përket raporteve me SHBA unë mendoj që është një raport shumë delikat. Ajo që unë mendoj është që opozita duhet të krijojë një partneritet të qenësishëm me SHBA-të. Nëse kjo do të thotë që lidershipi të jetë në një nivel tjetër me të rinj dhe të reja, pse jo”, deklaroi fillimisht deputeti i opozitës. Por, duke mos e përjashtuar Berishën si liderin e ri të opozitës, Mediu theksoi se ish-kryeministri apo kushdo politikan tjetër që do të drejtojë frontin opozitar nuk duhet të mendojnë vetëm për të marrë pushtetin, por për të ndryshuar mënyrën e qeverisjes. Sipas tij, opozita aktuale mund të rikthehet në pushtet nëse vepron si në vitin 2005. “Opozita duhet të gjejë mekanizmat e saj të veprimit pavarësisht situatës. Ne duhet te kthehemi në faktor stabiliteti. U përpoqëm ta bënim këtë në vitin 2005 duke sjellë një lidership të ri. Qëllimi i parë i Berishës dhe kujtdo në opozitë është ndryshimi i qeverisjes në vend. Pastaj se kush do të jetë Kryeministri, Berisha e ka thënë se duhet të zgjidhet me votim. Duhet një moment reflektimi si nga Berisha dhe të gjithë se çfarë mund të sjellim të re në drejtim”, përfundoi Fatmir Mediu.