Meta akuza Ramës: E bëri ‘non gratën’ biznesin kriminal të dytë më të fuqishëm në Shqipëri, ka gjobitur e kërcënuar biznesmenë, loboi dhe kundra meje

Ish-presidenti dhe aktualisht kreu i Partisë së Lirisë, Ilir Meta akuzoi kryeministrin Edi Rama se ka gjobitur shumë biznesmenë shqiptarë duke i kërcënuar se do të shpallen “non grata”. Gjatë një prononcimi për mediat dje, Meta tregoi se Rama ka korruptuar zyrtarë të huaj shtetërorë me qëllim sanksionimin e pronarëve të mediave, politikanëve, kundërshtarëve të Ramës nga shtetet e huaja. Aleati i Sali Berishës në opozitë e konsideroi shpalljen e listës “non grata” në Shqipëri si biznesi kriminal i dytë më i fuqishëm në Shqipëri pas trafikut të drogës. Meta është i bindur se shumë biznesmenë që janë goditur nga Rama dhe PS do të denoncojnë sulmet gjobvënëse dhe sanksionuese ndaj tyre. “Janë shumë biznesmenë që janë gjobitur nga banda e Edi Ramës. U vinin gjoba biznesmenëve. ‘Non grata’ u shndërrua nga Edi Rama dhe banda e Ramës në biznesin e dytë më të rëndësishëm në Shqipëri pas trafikut të drogës. Pronarë mediash, biznesmenë të mëdhenj dhe persona të tjerë që merreshin me aktivitete fitimprurëse, ky bënte listen dhe ua jepte njerëzve të vet. Këta komunikonin me njerëzit atje dhe ata ndërronin logot. Pra, në vend të Deripaskës dilte i sanksionuar emri i shqiptarëve, këta i takonin më pas e u tregonin ‘duhet të heqësh emrin, hajde se kemi një mik’ dhe e dimë të gjithë se sa takime janë kryer. Besoj se këta persona do të flasin, sepse kjo histori është hapur e nuk do të mbyllet më. Lista besoj do jetë më e gjatë”, tha fillimisht ish-presidenti. Më pas, ai akuzoi drejtpërdrejt kryeministrin se ka lobuar te zyrtarë të huaj për ta shpallur “non grata”. Sipas Metës, kjo është diçka që ka ndodhur me të vërtetë. (Emri im) ka qenë i pari në takimet e Ramës me çdo ndërkombëtar, sepse ka pasur synim si të korruptojë ndërkombëtarët për të krijuar idenë se ‘shiko, ky e ka me amerikanët’. E padiskutueshme. Kjo është një histori njerëzish të korruptuar”, deklaroi Meta.