Meta akuza Ramës: Kemi përballë një pushtet të korruptuar, gjysma e ministrave janë në burg, më 14 maj do rrëzojmë ‘Rilindjen’

Kryetari i Partisë së Lirisë, Ilir Meta hodhi dje akuza ndaj qeverisë për gjendjen ku ndodhet vendi. Gjatë një takimi me komitetin drejtues të partisë që drejton, Meta theksoi se mbrëmja e 14 majit do të sjellë ndryshim në jetën politike të vendit si dhe atë sociale e ekonomike. Duke akuzuar qeverinë për përfshirjen e anëtarëve të kabinetit në veprimtari të paligjshme, kreu i PL-së përmendi faktin e burgosjes së dy ish ministrave si dhe kontrollet e ushtruara në banesën e gruas dhe partneres së ish zëvendës kryeministrit, Arben Ahmetaj i cili aktualisht është nën hetim për korrupsion, shpërdorim detyre, pastrim parash dhe përfitime të paligjshme. “Kemi një pushtet të korruptuar që e propagandon veten si të fuqishëm por është më i kalbur se kurrë. Gjysmën e qeverisë e ka në burg gjysmës tjetër i bëjnë kontrolle të grave të partnereve të gjithçkaje”, deklaroi ai. Ndërkohë Meta theksoi se PS ka treguar se nuk di të qeverisë, duke bërë që vendi të përkeqësohet në raportet ndërkombëtare të sundimit të ligjit. Sipas tij, largimi i të rinjve vjen si shkak i katërfishimit të çmimit të apartamenteve ndërsa rrogat kanë qëndruar në të njëjtin nivel. “Ata kanë treguar se jo vetëm nuk dinë sesi të qeverisin por që as nuk duan të mësojnë sesi të qeverisin. Të gjithë raportet ndërkombëtare për Shqipërinë janë skandaloze. Shikoni shtetin e Kosovës, 11 vende është përmirësuar në rang ndërkombëtar në luftën kundër korrupsionit. Pse? Sepse kanë shtet të së drejtës, prandaj i kanë edhe rrogat më të larta se këtu. Ndërkohë këtu çmimi i metrit katrorë për banesat është katërfishuar. Por nuk janë rritur rrogat dhe pensionet, kjo është arsyeja përse shumë qytetarë largohen nga vendi në mënyrë masive”, nënvizoi kreu i PL-së, Ilir Meta.