Agjencia e Lajmeve SOT NEWS

Agjencia e Lajmeve SOT NEWS Lajme nga Shqiperia, Kosova, Rajoni dhe Bota, Politike, Kronike, Aktualitet, Dossier, Kulture, Sport

Meta në përurimin e shtatores së Nënë Terezës ​në Kroaci: Veprat e saj shembull për ne

Postuar: 23/11/2017 - 16:01

Presidenti Ilir Meta ishte i pranishën sot në Poreç të Kroacisë, ku u përurua shtatorja e Shën Terezës. I shoqëruar nga Kardinali Simonin (Troshani),Kryetari i Kuvendit të Maqedonisë Talat Xhaferi, e shumë personalitete të tjera, Meta ka vlerësuar marrëdhënien e popullit kroat me atë të popullit shqiptarë.

Ndër të tjera Presidenti i vendit theksoi se Nënë Tereza dhe veprat e saj duhet të shërbejnë si shembull dhe udhërrëfyes për të gjithë ne.

“Vepra e Nënë Terezës duhet të na udhëheqë edhe më tej, në punën tonë për një shoqëri tolerante, mirëkuptuese, me respekt të ndërsjellë dhe solidaritet pa dallime sociale, etnike, kulturore apo religjioze. Kjo vlerë e madhe e Shën Nënë Terezë, bëri që ajo të bëhet qytetare e botës, mike e popujve, e besimeve dhe qytetërimeve të ndryshme.”, tha Meta.

Fjala e plotë e Presidentit Meta:

 “Jam i nderuar që sot, së bashku me ju, po marr pjesë në përurimin e shtatores së Shën Nënë Terezës, këtu në Poreç të Kroacisë.

Kroacia, ky vend mik i shqiptarëve, çdoherë ka treguar mikpritje të mrekullueshme për ne. Lidhjet tona miqësore dhe vëllazërorë me kroatët janë shekullore, janë lidhje gjaku dhe shpirti, të cilat i vazhdoj kryetrimi ynë Skënderbeu me Raguzën e dikurshme e Dubrovnikun e sotëm, por, janë edhe ura jonë lidhëse shpirtërore Arbanasit e Zarës dhe diaspora jonë nga të gjitha trojet shqiptare që jeton në Kroaci.

Nga sot, lidhja e shqiptarëve me Kroacinë do të jetë edhe më e fortë, edhe më shpirtërore, sepse Poreçi, ky qytet i bukur do të ketë në gjirin e vet, si simbol të paqes, humanizmit, dashurisë, lidhjes dhe miqësisë, shtatoren e Shën Nënë Terezës.

Nënë Tereza, u bë nënë e njerëzve të pashpresë, e nevojtarëve që ishin më së shumti në nevojë, e jetimëve dhe e të gjithë njerëzve që kanë nevojë për dashuri dhe ngrohtësi njerëzore. Ky humanizëm dhe kjo devotshmëri e paparë e Nënë Terezës, bëri për vete personalitetet më të rëndësishme botërore.

Madhështisë shpirtërore dhe humane të Nënë Terezës, ju përulën më respekt mbretër e mbretëresha, lider politikë e shpirtërorë, që nga Papa Gjon Pali i Dytë e deri tek Nelson Mandela, që nga Mbretëresha e Mbretërisë së Bashkuar deri tek presidentët e Shteteve të Bashkuara të Amerikës dhe të mbarë botës demokratike.

Nënë Tereza ishte krenare për origjinën e saj shqiptare, as atëherë kur ishte në fillim të shërbimit si murgeshë e re, por as atëherë kur botërisht iu pranua kontributi si humaniste, duke u vlerësuar me Çmimin Nobel të Paqes.

Prandaj sot, ashtu si dje, por edhe në të ardhmen, kombi shqiptar do të mburret gjithmonë me emrin dhe veprën e Shën Nënës Terezës.

Nëna Tereza është simbol i vlerave të larta humane, i bujarisë, mëshirës, shpirtmadhësisë, flijimit për të tjerët, bashkëvuajtjes dhe vënies së interesit të përgjithshëm mbi atë personal.

Vlerat shpirtërore dhe humaniste të Nënës Terezës janë bashkim i vlerave më të mira të civilizimit shqiptar, dhe shpjeguesi më i saktë i frymës tolerante dhe kulturës së unitetit tonë kombëtar, edhe pse popull me përkatësi të ndryshme besimesh.

Shën Nënë Tereza, është përfaqësuesja me dinjitoze e të gjithë shqiptarëve, qofshin ata myslimanë, bektashinj, ortodoksë, katolikë apo evangjelistë.

Vepra e Nënë Terezës duhet të na udhëheqë edhe më tej, në punën tonë për një shoqëri tolerante, mirëkuptuese, me respekt të ndërsjellë dhe solidaritet pa dallime sociale, etnike, kulturore apo religjioze. Kjo vlerë e madhe e Shën Nënë Terezë, bëri që ajo të bëhet qytetare e botës, mike e popujve, e besimeve dhe qytetërimeve të ndryshme.

Të nderuar pjesëmarrës,

Sot, qyteti i bukur i Poreçit, me vendosjen e shtatores së Shën Nënë Terezës, po i bashkohet Zagrebit, Sarajevës, Shkupit, Prishtinës, Tiranës, Neë Yorkut, e dhjetëra e dhjetëra qyteteve në mbarë botën që, në qendrat e tyre, kanë vendosur shtatoret e Shën Nënë Terezës.

Urimet më të mira dhe mirënjohje për këtë gjest human dhe shumë fisnik që po bëni sot të dashur bashkatdhetar, si dhe ju drejtues të pushtetit vendor të Poreçit!

Këtë fjalë timen të shkurtër, do dëshiroja ta mbyllja me një thënie të Shën Nënë Terezës: “Ne nuk kemi nevojë për armë dhe bomba për të sjellë paqe në botë, ne kemi nevojë për dashuri dhe dhembshuri”.

Le të jetë vepra e Shën Nënë Terezës udhërrëfyes për të gjithë ne!”

/Agjensia e Lajmeve Sot News/

Na Beni Like Ne Facebook: 
Total votes: 11

Lajme nga e njejta kategori

Postuar: 23/02/2018 - 22:05

Tre vende që përfitojnë ekonomikisht shumë nga Adriatiku, janë angazhuar për të gjetur një zgjidhje të qëndrueshme lidhur me eliminimin e ndotjes së këtij deti.

Postuar: 23/02/2018 - 21:34

Ish-kryeministri Sali Berisha, me anë të një postimi në Facebook ka publikuar në mesazh të një qytetari i cili shkruan se administrata shtetërore nuk ka marrë pagesën për muajin

Postuar: 23/02/2018 - 21:06

 Kryetari i Partisë Demokratike, Lulzim Basha, e konsideroi një  mashtrim deklaratën e Kryeministrit Rama, që sipas tij, “njerëzit preferojnë të marrin 50 mijë l

Postuar: 23/02/2018 - 20:02

Kryeministri Edi Rama i ka cilësuar një manipulim të madh politik akuzat e opozitës për heqjen nga skema e ndihmës ekonomike të rreth 20 mijë familjeve në nevojë.

Postuar: 23/02/2018 - 18:31

12 mijë e 500 banorë të Njësisë Administrative Gostimë, Bashkia Cërrik, marrin shërbimin mjekësor në një Qendër Shëndetësore jashtë çdo kushti për të qenë e tillë.

Postuar: 23/02/2018 - 18:07

Partia Demokratike do të depozitojë në Kuvend një rezolutë për të ndalur kërcënimet dhe fyerjet e zyrtarëve të lartë shtetërorë ndaj gazetarëve.

Postuar: 23/02/2018 - 17:39

Nga Berati ku u mbajt mbledhja e radhës e Këshillit të Ministrave, Kryeministri Edi Rama ka deklaruar se qeveria po përballet me probleme për kontratat e HEC-eve të trashëguara.