Meta në alarm nga shkarkimi, kërcënon Ramën dhe Bashën se do e kenë përballë nëse Kushtetuesja e largon nga Presidenca

Afrimi i 1 shkurtit duket se ka trembur për vdekje presidentin Ilir Meta. Gjykata Kushtetuese do të mblidhet të martën e javës tjetër në orën 10:00 për të shqyrtuar vendimin e Kuvendit të Shqipërisë, i cili më 9 qershor të vitit 2021, votoi me plot 104 vota në favor të shkarkimit të presidentit Meta nga detyra, për shkak se për socialistët ai ka kryer shkelje të rënda të Kushtetutës dhe se sipas Partisë Socialiste, largimi i tij para kohe nga i pari i shtetit, ka lindur si një nevojë për të çliruar Presidencën nga një pengmarrje. Por teksa na ndajnë dhe tre ditë nga seanca e Kushtetueses, presidenti Meta po tenton të tërheqë vëmendjen para gjyqit të shkarkimit. Gjatë gjithë këtyre ditëve, kreu i shtetit është shfaqur tejet protagonist, ku ka dalë në media, ka reaguar në rrjetet sociale dhe ka zhvilluar takime të ndryshme, ndërkohë që kryefjalë të diskursit të tij politik ka qenë dyshja Rama-Basha dhe Gjykata Kushtetuese. Për këtë të fundit dhe anëtarët e saj, presidenti Meta ka artikuluar akuza të shumta, ndërkohë që të njëjtën gjuhë ai ka përdorur edhe kundrejt kryedemokratit Lulzim Basha dhe kryeministrit Edi Rama. Pra përmes daljeve të shumta dhe deklaratave të forta, Meta jo vetëm që po i bën presion Kushtetueses, por kërkon edhe të jetë në qendër të vëmendjen, me qëllim që të gjithë të mendojnë se ai është një figurë e rëndësishme. Thënë troç, zoti Meta po lëviz të gjithë gurët dhe po kërkon të jetë protagonist, me shpresën se do t’i shpëtojë shkarkimit nga Gjykata Kushtetuese, ndërkohë që po i bën edhe presion mazhorancës që të mos e shkarkojnë, pasi në të kundër do ta kenë përballë atë.

Meta sulmon qeverinë dhe opozitën për borxhin publik

Rasti më i freskët ku Meta ka kërkuar që të marrë gjithë vëmendjen, ka qenë paraditja e djeshme, teksa ai ka dalë në një konferencë para gazetarëve, ku situata politike dhe ekonomike kanë qenë dy nga heshtjet që ai ka komentuar. Presidenti Ilir Meta i bëri thirrje qeverisë që të përqendrojë vëmendjen te rritja e borxhit publik, që sipas tij, është një kambanë alarmi për vendin. Madje një mesazh kreu i shtetit e pati edhe për opozitën, për të cilën theksoi se nuk duhet të bëjë sikur nuk sheh. Pra Meta duket se po kërcënon Ramën dhe Bashën që të ndërhyjnë që të mos shkarkohet, pasi ndryshe ai do marrë LSI dhe do iu dalë përballë.  “Koha e gallatës me ekonominë dhe financat dhe taksat e shqiptarëve të marrë fund, duhet të fillojë dhe do të fillojë shumë shpejt, jam i sigurt për këtë çështje. Duhen të gjithë të marrin seriozisht situatën me borxhin, mos bëjnë sikur nuk shikojnë, edhe opozita. Është në interes edhe të një grupi oligarkësh që përfitojnë shumë nga kjo situatë, po është një dramë në rritje për shumicën e familjeve shqiptare sepse është borxhi ynë. Duhet të thellohemi të gjithë, sepse është borxhi i qytetarëve, që të mos përfundojmë si ndonjë vend tjetër e të dalim në falimentim”, deklaroi ai. Më tej duke folur në gjuhën e shifrave, Meta shtoi se qeveria ka fshehur borxhin publik, duke e deklaruar se stoku i borxhit është 80%, por referuar një raporti të Kontrollit të Lartë të Shtetit (KLSH), presidenti thotë se është shumë herë më i lartë që shkon deri në 84%. “Kërkoj nga Kuvendi dhe institucionet të huaja dhe në vend, të bashkëpunojnë që të bëhet një vlerësim real të borxhit publik”, nënvizoi Meta.