Çmimi i ujit të rishikohet në gjithë vendin, Kuvendi i kërkon ERRU-së të kryejë një analizë mbi format që do ndiqen dhe reduktojë stafin e ujësjellësve

Kuvendi i kërkon Entit Rregullator të Ujit të kryejë një analizë lidhur me strategjinë dhe mundësinë e tarifave që duhet të propozojnë për miratim 15 shoqëritë e reja të ujësjellës-kanalizimeve, të krijuara pas reformës së ndërmarrë gjatë vitit 2022. Në draft-rezolutën e Kuvendit theksohet se synimi dhe prioriteti i kësaj analize duhet të jetë unifikimi i tarifave për secilën shoqëri rajonale, teksa duhet të shoqërohet me konkluzione dhe rekomandime sesi duhet të kryhet ky proces. Paralelisht, në kuadër të reformës rrënjësore në sektorin e ujit, ERRU duhet të ketë në fokus kryesor reduktimin e stafit të tepërt të shoqërive UK rajonale, kur këto të fundit do të aplikojnë për tarifa të reja pranë saj, si dhe të monitorojë dhe rekomandojë nivelin e pagave dhe shpërblimeve që ndikojnë në shpenzime. Reforma e ndërmarrë vitin që shkoi në sektor solli bashkimin e shoqërive ekzistuese të ujësjellës- kanalizimeve në 15 subjekte me Kompetenca të Përbashkëta, nga 58 kompani që ishin më herët. Ndërkohë që, me krijimin e Ujësjellësve të bashkuar, shoqëritë e reja do të duhet të aplikojnë pranë Entit Rregullator të Ujit për tarifa të reja, teksa në fillim të vitit të kaluar ky dikaster miratoi edhe metodologjinë e re të përllogaritjes të tyre nën metodën “çmimi tavan”, që parashikon që nga pagesat e ujit, të mbulohen jo vetëm nevojat për të ardhura të shoqërisë, për mbulimin e kostove të operimit, por edhe mbulimin e kostove të investimeve që kryhen nga ujësjellësit. 51% e aksioneve të kompanive të reja të krijuara tashmë disponohen nga Ministria e Infrastrukturës dhe Energjisë, ndërsa pjesa tjetër ndahet midis bashkive.