Miroslav Lajçak: BE të hapë dyert për Ballkanin Perëndimor, ekziston rreziku i forcimit të tendencave autoritare joliberale

I dërguari i posaçëm i Bashkimit Evropian për dialogun Beograd-Prishtinë, Miroslav Lajçak, ka deklaruar se nuk ka alternativë tjetër për Ballkanit Perëndimor përveç integrimit. Në Forumin e Integrimit Ballkanik që u mbajt në Podgoricë AI shprehu shqetësimin se Evropa mund ta humbasë Ballkanin Perëndimor nëse nuk përshpejtohet procesi i zgjerimit. “Alternativa e vetme është anëtarësimi i plotë i këtyre vendeve në BE. Bashkimi Evropian, shtoi ai, duhet të jetë i sigurt që anëtarët e rinj të mos sjellin probleme shtesë në bllok. Ajo që kam frikë është se mund ta humbasim Ballkanin Perëndimor, i cili është i përkushtuar ndaj vlerave tona”, tha zoti Lajçak duke shtuar se në mungesë të alternativave, në vend që të krijohen shtete ligjore, media të pavarura, shoqëri civile dhe gjyqësorë të depolitizuar, ekziston rreziku i forcimit të tendencave autoritare joliberale. Një Ballkan i tillë, paralajmëroi Lajçak, do të ishte një instrument ndryshimi për interesat strategjike të lojtarëve të tjerë. “Kjo është arsyeja pse ne duhet të përshpejtojmë procesin e zgjerimit. Ne duhet të shohim gjërat në mënyrë reale dhe sa sinjale të forta pozitive po i dërgon rajoni Bashkimit Evropian”, tha ai. Në të njëjtën linjë me të kanë qenë edhe amerikanët. Pak kohë më parë Uashingtoni i bëri thirrje Bashkimit Europian që të hapë negociatat e anëtarësimit me Shqipërinë dhe Maqedoninë e Veriut. Zëvendësndihmës Sekretari amerikan i Shtetit për Europën dhe Euroazinë, Gabriel Escobar, tha se nisja e bisedimeve duhet të bëhet para përfundimit të këtij viti. Deklarata erdhi gjatë dëshmisë në nënkomitetin e Dhomës së Përfaqësuesve për Europë, Energji dhe Ambient. Escobar nënvizoi se administrata e presidentit amerikan, Joe Biden, ka dyfishuar përkushtimin për të punuar me aleatë dhe partner që Ballkani Perëndimor të përparojë në rrugën europiane. Zyrtari i Departamentit të Shtetit thotë se kjo është një shtysë për kryerjen e reformave dhe forcim i rezistencës ndaj ndikimit rus dhe kinez në derën e Europës.