Mjeku Isuf Kalo ndërroi jetë, ministrja e Shëndetësisë rrëfen bisedën e fundit me të

Mjeku i njohur Isuf Kalo është ndarë nga jeta në moshën 80-vjeçare pas një sëmundjeje të rëndë.

Ministrja e Shëndetësisë Ogerta Manastirliu përmes një postimi në faqen e vet në Facebook ka shprehur ngushëllimet dhe vlerësimet për mjekun e njohur.

“Me hidhërim mësova lajmin e ndarjes nga jeta të prof. Isuf Kalos. Bisedën e fundit me prof. Kalon e pata në mesin e dhjetorit, kur e ftova për të marrë pjesë në një prej atyre ngjarjeve që për profesorin ishin ”pikë e dobët”, akreditimi i institucioneve shëndetësore. Një proces që kishte pionier prof. Kalon dhe vizionin e tij. Por kontributi i profesor Isuf Kalos është i paçmuar për mjekësinë shqiptare, në shërbimin e Endokrinologjisë në QSUT për disa dekada. Ngushëllime familjes, kolegëve dhe miqve të shumtë të profesorit. U prehsh në paqe prof. Kalo”, shkroi ministrja Manastirliu.

Isuf Kalo është autor i një sërë botimesh në shtypin mjekësor të vendit të tij dhe jashtë saj, si dhe është anëtar nderi i disa komiteteve ndërkombëtare dhe shoqatave mjekësore në Evropë.