Muharrem Xhafa i përgjigjet Çelo Hoxhës: Çlirimi i Tiranës është meritë e partizanëve dhe e askujt tjetër, kush kërkon të sajojë një të vërtetë tjetër është bir i reaksionit

Tirana më 17 nëntor festoi 79-vjetorin e Çlirimit, dita kur forcat Nacional Çlirimtare fituan luftën kundër pushtuesve gjermanë. Por ajo vu u re është se Partia Socialiste ka devijuar nga premtimi për të mbështetur LANÇ. Dita e çlirimit të Tiranës u kalua në heshtje nga PS e Edi Ramës. Por si për ironi dhe si kundërpërgjigje ndaj Luftës Anti-Fashiste Nacional Çlirimtare, reagim të ashpër pati vetëm drejtori ekzekutiv i Institutit të Krimeve dhe Pasojave të Komunizmit, Çelo Hoxha. Ky i fundit doli në skenë pas një pauze duke i “ringjallur”, teksa përmes një statusi në rrjetet sociale akuzoi komunistët se para se të hynin në kryeqytet në nëntor të vitit 1944, bënë spastrimin e figurave të njohura intelektuale antikomuniste, ish-ushtarakëve ose njerëzve të biznesit. Lidhur me këtë situatë ka reaguar ish-shef i Sektorit të Edukimit në aparatin e KQ të Partisë së Punës, Muharrem Xhafa. Ai u shpreh gjatë reagimi për gazetën “Sot”, se çlirimi i Tiranës është meritë e partizanëve dhe e askujt tjetër. Sipas tij, kush kërkon të sajojë një të vërtetë tjetër është bir i reaksionit. “Kryeqytetin e atdheut, Tiranën, e çliruan partizanët heroikë shqiptarë, mbështetur fuqishëm nga populli i saj. Kush kërkon të sajojë një tjetër të vërtetë është bir i reaksionit! Ngjan si paradoks po edhe vetë pushtuesit gjermanë pranojnë çfarë përjetuan në luftën e ushtrisë partizane për çlirimin e Tiranës, me disa mospërputhje në shifrat e humbjeve të forcave njerëzore e materiale, gjë kjo e kuptueshme, sepse cilido humbës synon t’i zvogëlojë humbjet e tij. Brezi i ri duhet të dijë se për çlirimin e kryeqytetit është bërë 19 ditë luftë e ashpër (29 tetor deri 17 nëntor 1944) rrugë më rrugë e rrugicë më rrugicë, barrikadë më barrikadë, shtëpi më shtëpi e trup më trup! Një luftë heroike e vërtetë! Forcat pushtuese gjermane e patën të pamundur të përballonin sulmet e ushtrisë së organizuar partizane, ndaj ato, në mëngjesin e 17 nëntorit 1944, ndalën qëndresën, njohën humbjen dhe morën rrugën e humbjes. Humbjet e ushtrisë gjermane qenë të mëdha, po dhe forcat partizane patën jo pak të vrarë e të plagosur! Heroizmi i partizanëve për çlirimin e Tiranës, në zbatim të urdhrit të Komandantit të Përgjithshëm të Ushtrisë Nacionalçlirimtare Shqiptare, Enver Hoxhës, përbën një nga faqet më të ndritura të LANÇ-it”, u shpreh Xhafa.

Çlirimi i Tiranës

17 Nëntor 1944, partizanët heroikë shqiptarë, të mbështetur fuqishëm nga populli i Tiranës, çliruan Tiranën?! Tjetër të vërtetë nuk ka! Ata që kërkojnë të sajojnë të vërteta të tjera, ata janë bashkëpunëtorët vendës të nazistëve gjermanë. Interesante është që, edhe vetë pushtuesit gjermanë nuk kërkojnë ndonjë tjetër të vërtetë, përveç asaj që përjetuan në luftën e Tiranës, përjashtuar ndonjë mospërputhje në shifrat e humbjes së tyre, çka është e pashmangshme, se humbësi gjithnjë synon t’i zvogëlojë humbjet. Jo vetëm brezi i ri, po edhe të gjithë shqiptarët duhet të dinë se për çlirimin e kryeqytetit është luftuar 19 ditë (29 tetor deri 17 nëntor 1944) rrugë më rrugë, barrikadë më barrikadë, shtëpi më shtëpi e trup më trup. Një luftë heroike! Po kështu duhet të dinë se pushtuesit gjermanë, të pamundur për të përballuar sulmet e ushtrisë partizane, në mëngjesin e 17 nëntorit 1944 ndalën qëndresën e tyre u tërhoqën dhe duke njohur humbjen, vijuan rrugën e humbjes. Në luftën për çlirimin e Tiranës, forcat pushtuese gjermane lanë më tepër se 3000 të vrarë e shumë të tjerë të plagosur. Mbi 300 ushtarë nazistë u zunë robër, ndërsa u kapën një sasi e madhe materialesh e municionesh luftarake të ndryshme, si topa, tanke, mitraloz, automjete, karro me materiale, kafshë, municione e armatim i lehtë, pa folur për shkatërrimin e shumë materialeve teknike luftarake. Gjatë veprimeve luftarake për spastrimin e kryeqytetit u arrestuan mbi 500 kuislingë e tradhtarë. Po, edhe në anën e forcave partizane pati 417 të vrarë e të plagosur (vetëm në kryeqytet u vranë 127 luftëtarë). Qindra njerëz nga popullsia civile u masakruan barbarisht prej forcave naziste dhe prej bashkëpunëtorëve të tyre ballisto-zogistë. Tirana, si e gjithë Shqipëria, u çlirua me gjak e me sakrifica të mëdha!