Nënkryetari i Bashkisë së Tiranës flet për shembjet e banesave te 5 Maji: Çfarë do të ndodhë me personat që kanë ndërtuar pa leje

Nënkryetari i Bashkisë së Tiranës, Arbjan Mazniku, në një lidhje Skype në emisionin Zona Zero tregoi versionin e tij për tensionet e sotme tek “5 Maji” pas shembjeve të disa shtëpive.

Mazniku tha se banorët për këtë proces janë lajmëruar 1 muaj përpara dhe është lënë kohë për ankesat. Ai gjithashtu tregoi se të gjithë banorët e shpronësuar do të përfitojnë metër për metër sipërfaqen që kanë.

“Është bërë lajmërimi për procesin dhe për volumet që do përfitojnë nga procesi i shpronësimit. Janë bërë disa ankime, ka pasur të drejta dhe të padrejta.

Iu la një muaj kohë për ankim. Sipërfaqja që do të marrin, është me hipotekë në sipërfaqet e reja.

 I hapim rrugë kështu vijimit të ndërtesave që përveç se do përfitojnë edhe banorët e dëmtuar nga tërmeti por do përfitojnë dhe vetë këta banorë.  Banorët përfitojnë metër për metër sipërfaqen që kanë,” tha Mazniku.

Po ata që kanë ndërtuar pa leje?

“Pjesa më e madhe janë ndërtuar pa leje, por janë legalizuar dhe kështu do marrin sipërfaqen që kanë. Disa afër lumit, nuk janë legalizuar dot se janë shumë afër lumit. Ata do shpronësohen se aty do ndërtohet ndonjë park a diçka dhe pastaj do marrin një pronë komplet të ligjshme,” u shpreh nënkryetari i Bashkisë.