Nga rritja e korrupsionit, te koncesionet, BERZH prezanton raportin e tranzicionit 2022-2023 për Shqipërinë dhe "kryqëzon" qeverinë

Në gjetjet për Shqipërinë të raportit për Tranzicionin e Bankës Europiane për Rindërtim dhe Zhvillim për vitin 2022-2023, cilësia e qeverisjes së Shqipërisë është në përkeqësim. Sipas raportit treguesi që mat mirëqeverisjen ka rënë nga 5.26 pikë që ishte në 2016 në 4.62 pikë në 2021. Arsyet kryesore se përse keqqeverisja në vendin tonë po thellohet sipas raportit është rritja e informalitetiti dhe korrupsionit.“Rezultatet e qeverisjes janë përkeqësuar ndjeshëm në një numër sferash të ekonomisë gjatë gjashtë viteve të fundit, duke reflektuar kryesisht rritje të informalitetit dhe korrupsionit të perceptuar siç shihet, për shembull, në Shqipëri dhe Bosnjë dhe Hercegovinë dhe rënie në efektivitetin e perceptuar të gjykatat siç vërehet, për shembull, në Poloni. Disa sfera të ekonomisë kanë parë gjithashtu përkeqësime në pavarësinë e gjyqësorit, transparencën buxhetore dhe zbatimin e kontratave", thuhet ndër të tjera në raport. Po ashtu, BERZH parashikon që ekonomia shqiptare të ngadalësohet në vitin 2023, pas një zhvillimi pozitiv mbi pritshmëritë menjëherë pas pandemisë nga 8.5% në vitin 2021, rritja do të jetë 3%, si për vitin 2022, ashtu edhe për vitin 2023. Ajo evidenton si risqet më të rëndësishme ndaj zhvillimit ekonomik inflacionin shumë të lartë, si dhe shtrëngimi i kushteve financiare, i cili mund të ulë konsumin e familjeve ashtu si dhe investimet në ekonomi. Ndërkohë, drejtoresha e Zyrës së BERZH-it në Shqipëri, Ekaterina Solovova u shpreh se janë kryer investime në 400 projekte në vitin 2022. Për vitin që lamë pas thotë se u shënua rekord për peshën e sektorit privat në aktivitetet financiare. “BERZH ka kryer investime në shifra rekord, 400  projekte të financuara në 2022. Projekte që mbështesin ekonominë e gjelbërt, 6 mld euro investime. 1.7 mld euro në mbështetje të Ukrainës. 200 mln euro u mobilizuan nga institucionet financiare partnere. S’do i bënim këto pa grantet dhe garancitë e dhëna nga partnerët. 1.7 mld euro për të mbështetur nevojat financiare të Ukrainës gjatë kësaj periudhe të agresionit rus. Dëshiroj të falenderoj dhe Shqipërinë që dha kontributin e saj në këtë përpjekje për të ndihmuar Ukrainën”, deklaroi Solovova.