“Ngjarje tronditëse”/ Presidenti Meta reagon i revoltuar për ekzekutimin e biznesmenit në Fier dhe grabitjen e një tjetri në Krujë, i dërgon ultimatumin e prerë Policisë së Shtetit

Presidenti Ilir Meta ka dalë me një reagim të revoltuar për ngjarjet e fundit kriminale që kanë ndodhur në vendin tonë, ku një biznesmen u ekzekutua në Fier dhe një tjetër ra pre e grabitjes në Nikël të Fushë-Krujës.

Përmes një postimi në rrjetet sociale, Meta teksa shkruan se këto ngjarje përbëjnë një kërcënim serioz për vendin, i bën thirrje Policisë së Shtetit, Prokurorisë, Shërbimit Informativ të Shtetit dhe gjithë institucioneve ligjzbatuese që të bashkëpunojnë për zbardhjen e tyre dhe arrestimin e personave përgjegjës.

“Dënoj me forcë aktet tepër të rënda kriminale të ditëve të fundit, vrasjen e biznesmenit Backa në qendër të Fierit, si dhe grabitjen dhe torturimin e biznesmenit Çangu në Nikël të Krujës.

Këto ngjarje, që kanë tronditur thellë opinionin publik, përbëjnë një kërcënim serioz për rendin, sigurinë e jetës dhe pronës së qytetarëve, por edhe për zhvillimet ekonomike dhe sociale të vendit.

I bëj thirrje Policisë së Shtetit, Prokurorisë, Shërbimit Informativ të Shtetit, si dhe të gjithë institucioneve të tjera ligjzbatuese në vend, të forcojnë bashkëpunimin për arrestimin e menjëhershëm të autorëve me rrezikshmëri të lartë dhe vënien e tyre para drejtësisë, por edhe për të marrë të gjitha masat efektive për të parandaluar ngjarje të tilla të rënda dhe tronditëse kriminale.”, shkruan Meta.