Kërko Për

Agjencia e Lajmeve SOT NEWS

Agjencia e Lajmeve SOT NEWS Lajme nga Shqiperia, Kosova, Rajoni dhe Bota, Politike, Kronike, Aktualitet, Dossier, Kulture, Sport

Opozita zhvendoset në Vlorë, Idrizi në krah të djathtë të Bashës, Dule jep sinjale largimi, kreu i PD sulmon Ramën dhe Markun

Postuar: 21/09/2018 - 10:04

Opozita e bashkuar u zhvendos dje në Vlorë ku zhvilloi dhe mbledhjen e radhës në shenjë proteste kundër lidhjeve të qeverisë me krimin. Në mbledhjen që u zhvillua paralelisht me seancën plenare, u pa prezenca e aleatëve opozitarë dhe kryesisht aleatit më të ri të PD, kreut të PDIU, Shpëtim Idrizi, i cili për çudi ishte në krah të djathtë të Bashës. Ndërkohë që Kryemadhi ishte në krah të majtë, ndërsa aleatët e tjerë ishin rreshtuar mes deputetëve. Por vendosja e Idrizit në krah të djathtë, duket se ka qenë një sinjal i pastër se Basha po eviton LSI-në nga bashkëpunimi dhe po fokusohet tek PDIU. Por krahas këtij detaji, mbledhja e Vlorës, dha sinjale gjithashtu se kreu i PBDNJ, Vangjel Dule do të largohet nga koalicioni opozitar pasi zgjodhi të bojkotonte mbledhjen. Gjithashtu nga ana tjetër edhe ish-kryeministri Sali Berisha nuk mori pjesë në mbledhje, duke lënë të nënkuptohet se ka qenë kundër vendimit të Bashës për t’u zhvendosur në Vlorë. Kjo për faktin se ish-kryeministri Sali Berisha e ka parë gjithmonë si një mundësi të mirë çështjen e ligjit të tetarit për të shkaktuar protesta masive në mënyrë që PD të përmbyste qeverinë dhe të rikthehej në pushtet. Madje, ai ka bërë shpesh thirrje për revolta, ndonëse kreu demokrat ka vendosur që të mos i përkrahë idetë e tij.

Kreu i PD sulmon Ramën dhe Markun

Kreu i PD, Lulzim Basha sulmoi dje kryeministrin Edi Rama dhe kryeprokuroren Arta Marku se janë vënë në shërbim të krimit. Në fjalën e mbajtur gjatë takimit të opozitës në Vlorë, kryedemokrati u shpreh se Marku është shërbëtore e kryeministrit Rama dhe jo Prokurore e Republikës. “Sikundër i bëj thirrje disa mediave që vazhdojnë të bëjnë fasadën e qeverisë, ta ndërpresin lidhjen me Arta Markun se Arta Marku po të ishte prokurore, sot duhej të arrestonte të paktën një duzinë prej atyre prej të cilëve po u flet. Po Arta Marku është shërbëtore e Edi Ramës dhe jo Prokurore e Republikës. Kështu që vendosni të vazhdoni të transmetoni shërbëtorët e qeverisë e kuptoni vetë se çfarë ju bën ju të nderuar pronarë dhe kryeredaktorë të medias, një akt i tillë. Pra, falënderoj edhe një herë të gjitha mediat që janë rikthyer online në këtë takim. Nuk ka asnjë kuptim t’i jepni shqiptarëve iluzionin, se në Kuvend po ndodh diçka tjetër, përveç vjedhjes. Në fakt, prania e kryeprokurores kukull të Edi Ramës në Kuvendin e Shqipërisë, është certifikata e vjedhjes”, tha ai. Basha tha se nëse prokurorja do bënte detyrën do vinte në Kuvend me pranga dhe do të arrestonte të gjithë deputetët që kanë lidhje me krimin. “I vetmi rol dhe i vetmi justifikim për praninë e Prokurorit të Përgjithshëm të Republikës në Kuvendin e Shqipërisë, sot do të ishte n.q.s do të kishte shkuar me pranga dhe të tërhiqte zvarrë një duzinë hajdutësh dhe politikanësh të korruptuar dhe të lidhur me krimin në atë sallë, të cilët bashkë me pjesën tjetër të rilindësve dele, po përgatiten të konsumojnë edhe një herë aktin e vjedhjes me ligj”, u shpreh Basha.

Basha: Papunësia në nivel rekord

Kreu i PD, Lulzim Basha akuzoi kryeministrin se përmes lidhjeve të tij me krimin ka shkatërruar ekonominë në Vlorë. Basha tha papunësia është në nivele rekord dhe numri i të rinjve po largohet nga vendi çdo ditë e më shumë. “Ndërkohë, ekonomia e Vlorës është në kolaps total. Papunësia është në nivele rekord. Numri i të rinjve vlonjatë që largohen nga qyteti i tyre dhe nga vendi është konkurrues me numrin e të rinjve të një tjetër qyteti fqinj, atij të Fierit. Krimi i organizuar, në bashkëpunim me Edi Ramën, e ka shndërruar Vlorën në një zonë lufte të vërtetë. Luftë për kontroll dhe treg midis bandave kriminale, ku viktimat janë qytetarët e pafajshëm, janë prindërit dhe fëmijët e tyre, janë biznesmenët e ndershëm, është ekonomia e këtij qyteti, është e ardhmja e këtij qyteti, i cili ka një vend të veçantë për krenarinë historike dhe tipike, dhe që sot është kokulur”, tha ai. 

Endri Arizi

/Agjensia e Lajmeve Sot News/

Na Beni Like Ne Facebook: 
Total votes: 5

Lajme nga e njejta kategori

Postuar: 23/10/2018 - 11:10

Komisioni i Ekonomisë dhe Financave ka miratuar projektligjin për mbylljen e lojërave të fatit duke e kaluar në Kuvend për seancën e së enjtes për ta vulosur përfundimisht nismën e qeverisë.

Postuar: 23/10/2018 - 11:03

Komisioni i Ekonomisë po diskuton projekt ligjin për lojërat e fatit.

Postuar: 23/10/2018 - 10:53

Ditën sotme përfaqësuesi e Komisionit të Ekonomisë janë mbledhur për të diskutuar për ligjin për

Postuar: 23/10/2018 - 10:37

Ish-ministri i Drejtësisë,  Ylli Manjani, ka ironizuar Rilindjen në lidhje me arrestimet.

Postuar: 23/10/2018 - 10:33

Kryesia e Partisë Socialiste ka shkarkuar 11 drejtues të PS në rrethe.Arsyet e shkarkimit ishin&n

Postuar: 23/10/2018 - 10:30

Arrestimet e ditëve të fundit kanë shkaktuar ditën e djeshme debate shumë të forta në mbledhjen e

Postuar: 23/10/2018 - 10:20

Arrestimet e së dielës kanë ndezur dje situatën politike në vend.