Pazaret e prishura Rama-Vuçiç-Grenell-Thaçi për shitjen e Veriut i kanë vënë flakën çështjes kosovare dhe trojeve shqiptare

Kosova është sërish në një rrezik shumë të madh. Projekti kriminal i mbetur në sirtar i Ramës-Vuçiçit-Grenell-Thaçit që i fal Serbisë veriun e Kosovës i kanë vënë sërish flakën çështjes kosovare dhe trojeve shqiptare. Si çdo krim dhe ky projekt po kërkohet të ndërtohet mbi gënjeshtra dhe kamuflime. Thaçi në atë kohë u përpoq ta shesë si një hartë të vizatuar nga komuniteti ndërkombëtar, mbi të gjitha nga Shtetet e Bashkuara, por që në të vërtetë pas tij fshiheshin qarqe serbo-ruse. Këtë herë Rama kërkon t’i shkojë deri në fund projektit të ndarjes së Kosovës, i hartuar në Beograd dhe i pranuar nga Vuçiç, Thaçi dhe Edi Rama në Nish në vjeshtën e vitit 2017.

Edhe pse fitorja kundër terrorit serb nga policia dhe shteti i Kosovës e ka varrosur atë, Rama kërkon ta ngjallë këtë pazar, këtë herë duke përdorur skemën e KFOR. Rama në sinkron të plotë me Vuçiçin dhe politikanë të tjerë në Serbi kërkojnë që KFOR të marrë nën patronazh Veriun e Kosovës. Por çdo përpjekje djallëzore e hapur që synon rivendosjen e kontrollit të Veriut për KFOR nuk është asgjë tjetër por përpjekje për të kaluar nga Republikë e Kosovës në Republikë të KFOR.
Rama bashkohet me serbët, të cilët duan të arrijnë qëllimin e tyre final, nxjerrjen jashtë loje të shtetit kosovar në Veri. Vetë KFOR e ka bërë të qartë se ekskluzivitetin për rendin e sigurinë e ka Policia e Kosovës dhe KFOR është në mbështetje të saj. Rama dhe Serbia mendojnë ndryshe duke kërkuar të riaktivizojnë pazaret e prishura të vitit 2017, të cilat nuk u finalizuan dot kurrë.

Së fundmi, Rama dhe Vuçiç janë shfaqur në një linjë dhe me personazhin që ka bërë aleancë me ata që punuan dhe luftuan fort për ndarjen e Kosovës, si Richard Grenell me njerëzit e tij të administratës Trump. Grenell gjithë këto ditë ka sulmuar administratën e Joe Biden, por edhe lidershipin kosovar, që ka dëshmuar se po shkëputet nga projektet e vjetra të rrezikshme për rajonin e Ballkanit dhe se po kërkon një marrëveshje përfundimtare që Serbia të njohë përfundimisht Kosovën. Grenell, ka thënë atë që thotë edhe Vuçiç, për praninë e forcave ushtarake serbe në afërsi të kufirit me Kosovën, prani kjo që u kërkua nga Uashingtoni “urgjentisht” të largohet nga atje. Atë që Vuçiç tha në Financial Times, ku madje akuzoi Antony Blinken dhe Jake Sullivanin se thanë gënjeshtra, e përsëriti fjalë për fjalë Grenell. Por tradhtarëve si Rama dhe qarqeve serbo-ruse po ua tregon vendin kryeministri Albin Kurti, i cili po tregon cilësitë e një burri shteti që nuk vendos fatet e kombit të tij në “duart” e Edi Ramës që ka disa vite që bën pazare me trojet shqiptare në interes të Serbisë me në krye Vuçiç.