Presioni ndaj gazetarëve dhe zgjedhjet, OSBE organizon konferencë të përbashkët me KQZ, Celibashi apel Komisionit të Reformës Zgjedhore për raportimin mediatik

Përfaqësia e OSBE në Shqipëri, së bashku me organizma të tjerë ndërkombëtarë që kanë vendosur selitë në vendin tonë, dhanë mesazhin që media të mos trysnohet dhe shantazhohet gjatë raportimit për fushatën elektorale dhe ecurinë e zgjedhjeve lokale të 14 majit. Në një konferencë të përbashkët, kryesuesi i delegacionit të OSBE në Shqipëri, Guido De Sanctis garantoi mbështetjen e organit që përfaqëson për mediat në vendin tonë. Ai vuri theksin te ankesat e gazetarëve që shpeshherë përballen me presione të shumta gjatë ushtrimit të profesionit të tyre. “Vëzhguesit tanë të misioneve të drejtuar nga ODIHR kanë theksuar në çdo palë zgjedhje rëndësinë e pavarësisë editoriale në media dhe nevojën për t’i mbështetur në krijimin e kushteve për të shmangur auto-censurën, sepse gazetarët flasin shpesh për presionet e shumta që përballin në punën e tyre gjatë raportimit. OSBE mbështet mediat në përmbushjen e standardeve e etikës profesionale, transparencës për të informuar saktë mbi ecurinë e fushatave”, tha në fjalën e tij ambasadori i OSBE De Sanctis. Kryetari i Komisionit Qendror të Zgjedhjeve, Ilirjan Celibashi shprehu optimizëm se Komisioni i Reformës Zgjedhore do të përmirësojë kuadrin ligjor për sa i përket raportimit të mediave për fushatat zgjedhore në vazhdimësi. “Rrjetet sociale dhe mediat online kanë marrë një zhvillim shumë të madh edhe në këtë fushë, por ende nuk kanë rregullimet e duhura ligjore. Shpresojmë që në Reformën Zgjedhore kjo të marrë një zgjidhje. Asgjë nuk e pengon Kuvendin dhe partitë që të vendosin rregulla në këtë fushë me interesit të madh publik”, deklaroi kryekomisioneri i zgjedhjeve në Shqipëri, Ilirjan Celibashi.