Protesta e 6 dhjetorit, Spartak Ngjela: Berisha kundër Perëndimit, qytetarët të mos i shkojnë pas një tradhtari të shpallur ‘non grata’

Avokati Spartak Ngjela e ka quajtur “lëvizje tradhtare” protestën e planifikuar nga Partia Demokratike për t’u mbajtur në 6 dhjetor në Tiranë, ditën kur liderët e BE-së vizitojnë Tiranën. Në një intervistë televizive, avokati theksoi se kreu i ‘Rithemelimit’ Sali Berisha ishte kundër perëndimit dhe historia do ta gjykonte opozitën për këtë lloj proteste që, sipas tij, ishte njësoj si të protestohej kundër anëtarësimit të Shqipërisë në Bashkimin  Europian.“Deri te pjesa e parë që është demokraci është e vërtetë. Kurse fakti që këtu është samiti i Bashkimi  Europian për të na futur në BE lëvizja është esatiste. Do ta kishte zili Esat Pashë Toptani që ka varrin në Beograd. Nuk duhej ta bënin këtë gabim sepse bëhet fjalë subjekt juridik si samiti europian. Pse do protestojnë? Kundër Europës? Kundër futjes së Shqipërisë në BE? Ose është i paaftë intelektualisht ose bën sikur nuk kupton. Ne nuk mund të na marrin për budallenj. Kreu i tyre nuk është me perëndimin, sepse është non grata atje. Më dëgjoni mua, merrni tufat me lule dhe shkoni atje, mos i shërbeni Esat Pashës. Ne shyqyr që po bëjmë një samit perëndimor këtu, këta kërkojnë të sjellin këtu Lindjen e Mesme. Kush është pro perëndimit nuk bën protestë në atë datë”, u shpreh Ngjela. Ndërkohë, edhe më herët avokati Spartak Ngjela, ka komentuar protestën e 6 dhjetorit. Ai tha se ajo është një protestë kundër Bashkimit Europian. Avokati deklaroi se ka kohë që Berisha nuk është më me Bashkimin Europian, që mes të viteve 1984. “Ajo është një protestë kundër Bashkimit Europian. Ka kohë që Berisha nuk është më me Bashkimin Europian, ka që në mes të viteve 1984,  ai nuk është më me perëndimin dhe kjo gjë është e provuar. Por, a do ta bëjë Berisha atë protestë? Nuk do ta bëjë dot, sepse ka një ligj për protestat, kur bënë një protestë duhet që të marrësh  leje në shtet. Dhe në këtë rast shteti nuk i jep leje disa antiperëndimorëve që të bëjnë protestë”, tha ai.