PS u shpall “luftë” deputetëve të Berishës, Gogu: Kush thyen rregulloren do të përjashtohet nga Parlamenti

Socialistët do t’i qëndrojnë vendimit të tyre. Çdo deputet, mbështetës i Sali Berishës, që thyen rregulloren e parlament do të përjashtohet. I fundit në listën e gjatë të të përjashtuarve nga 5 deri në 10 ditë nga kuvendi pritet të jetë demokrati Edmond Spaho. Për të nga PS është paralajmëruar përjashtimi për 20 ditë. Në të fundit mbajti të bllokuar foltoren, dëmtoi mikrofonin dhe i ra bilbilit gjatë gjithë seancës parlamentare. Toni Gogu, nënkryetari i grupit parlamentar të PS, u shpreh në një media këtë fundjavë se socialistët do të ndëshkojnë çdo sjellje që jo vetëm është në kundërshtim me kodin e etikës dhe rregulloren e kuvendit, por edhe me edukatën qytetare. “Partia Socialiste do të sigurojë që kurrë mos t’i hiqet fjala opozitës, kurrë, sepse është një përjetësi shumë e keqe që ka pasur PS, kështu që ne do tu vazhdojmë tu japim atyre fjalën sa herë që të mundim, ama do të ndëshkojmë çdo sjellje që jo vetëm është në kundërshtim me kodin e etikës dhe rregulloren e kuvendit, por unë besoj që është në kundërshtim me edukatën qytetare. Kemi përjetuar tortura që besoj i kanë përjetuar në Dachau apo në Aushvic”, deklaroi ai. Nënkryetari i grupit parlamentar të socialistëve Toni Gogu thotë se konfliktet e brendshme në Partinë Demokratike nuk mundet të importohen në sallën e kuvendit.“Opozita zgjedh që atë sherrin që kanë mes vetes së tyre, ta sjellin këtu dhe të bëjnë sikur është sherri i shqiptarëve, ndërkohë që jam i bindur që në çdo familje shqiptare ajo gjëja nuk ndodh. Pse kemi kaq shumë deputetë të cilët nuk duan të flasin për çështje që shqetësojnë shqiptarët, por duan të flasin për disa çështje që i interesojnë vetëm  një njeriu të cilit po i vjen ora e drejtësisë”, nënvizoi Gogu. Prej fillimit të sesionit të ri parlamentar, kaosi është bërë kryefjala e seancave parlamentare. Demokratët akuzojnë Edi Ramën se me përjashtimet e njëpasnjëshme ai po përpiqet t’i mbyllë gojën opozitës për çështje me interes publik si ajo e “McGonigal”.