Qytetarët i lënë afat Ramës deri ditën e hënë për të shkarkuar Çuçin, Kumbaron dhe Nanon, në të kundërt sërish në protestë, reagon ambasada e SHBA

Për rreth dy orë, qytetarët të mbështetur nga opozita, kanë protestuar ditën e djeshme në Tiranë si reagim ndaj vrasjes së 7-vjeçares Jonada Avdia nga gomonia në Himarë. Protesta u thirr nga aktivistë të shoqërisë civile, por asaj iu bashkuan edhe figura të opozitës, duke nisur nga Sali Berisha dhe simpatizantët e tij, si edhe kreu i Partisë së Lirisë, Ilir Meta i cili u pa në krah të djalit të tij, Besartit. Me thirrjet ‘Jepni dorëheqjen’, ‘Ju jeni vrasës’, protestuesit i kanë lënë ultimatum kryeministrit Edi Rama deri të hënën që të shkarkojë ministrin e Brendshëm Bledi Çuçin, ministren e Turizmit, Mirela Kumabro dhe Drejtorin e Përgjithshëm të Policisë së Shtetit, Gledis Nano, duke i akuzuar si përgjegjësit kryesorë për ngjarjen. “Ultimatum, nëse deri ditën e hënë nuk shkarkon përgjegjësit e vrasjes, Çuçin, Kumbaron, drejtorin e policisë, do të vijojmë me protesta të pandalshme. Vrasja e Joanldës nuk mbyllet këtu ne do të kërkojmë drejtësi deri në fund”, tha protestuesja. Gjithashtu për protestën ka reaguar dhe Ambasada Amerikane. Ajo u kërkoi qytetarëve të saj që të bëjnë kujdes dhe të shmangin grumbullimet e mëdha. “Ndërsa shumë tubime të mëdha mund të jenë paqësore, disa situata mund të ndryshojnë shumë shpejt dhe në mënyrë të paparashikuar,” thuhet në njoftimin e ambasadës. Qytetarëve amerikanë, ambasada u kërkoi që të monitorojnë median lokale dhe të ndjekin udhëzimet e forcave të rendit për informacionet më të fundit. Protestuesit u zhvendosën nga pedonalja 'Murat Toptani' në oborrin e Ministrisë së Brendshme. Kjo lëvizje e protestuesve solli edhe reagimin e policisë, e cila u përpoq t'i ndalojë.