Rakip Suli sfidon Berishën: Hajde kandido përballë meje ta shikosh çfarë rezultati poshtërues do marrësh

Pas akuzave të ngritura të premten nga ish-kryeministri Berisha në adresë të kryebashkiakut Rakip Sulit, duke thënë se ka dorë, ka ardhur dhe përgjigja e qytetarit të parë të Kamzës. Sipas tij, Berisha në Kamëz shkon vetëm për mitingje, teksa kryeministri Edi Rama në tre vite ka inauguruar 28 kanitere ndërtimi. Madje përmes një statusi në rrjetet sociale Suli, sfidon Berishën, duke e ftuar të kandidojë në Kamëz, për të parë si është situate sot. “Dua të të ftoj të kandidosh vetë në Kamëz e ta shikoni se çfarë rezultati poshtërues do marrësh. Do të të krijoja kushte që me karrocë për të moshuarit të vije dhe të vizitoje objektet arsimore që janë bërë në Kamëz, të shikoje cilësinë dhe kushtet e fëmijëve në shkolla kopshte e çerdhe dhe ta krahasoje me modelin tënd më të shëmtuar 30 vjeçar.  Ka mbi 30 vjet që vjen në Kamëz vetëm për mitingje. Në vetëm 3 vite Kryeministri Edi Rama ka ardhur plot 28 herë për të parë kantierët e punëve publike në këtë Bashki”, deklaroi ai. Më pas duke iu përgjigjur ironisë se kur Rakipi shkon në fshatin e tij në Dibër, të nesërmen numërojnë kuajt, Suli shton se është kryelartë për zonën nga vjen. “Unë vij nga një zonë e Dibrës me shumë tradita dhe me histori të lavdishme. Jam kryelartë për zonën nga vij dhe jam i lumtur që i kam përfaqësuar denjësisht në udhëtimin tim qoftë privat qoftë publik. Pyet mirë Sali, mos i lësho fjalët si lopa bajgën. Sa për kuajt që trazojnë mendjen tënde të sëmurë dhe gojën tënde të pistë, mund të të them se jam kalorës dinjitoz i Çidhnës e Dibrës prej nga vij dhe duelet e mia i kam fituar gjithmonë. Mbase kjo jua trazon psiqikën e sëmurë. Shihemi në 14 Maj!”, shkruan Suli.