Rama: Çështja ‘Beleri’i takon drejtësisë, progresraporti i KE është vlerësim për reformën

Kryeministri Edi Rama, dje në një intervistë për “France24”, foli për ecurinë e procesit të integrimit europian të Shqipërisë si dhe për paralajmërimin e Greqisë për të bllokuar procesin për shkak të çështjes “Beleri”. I pyetur lidhur me bllokimin nga Greqia të letrës së 27 vendeve anëtare për hapjen e kapitujve për shkak të çështjes “Beleri”, Rama u shpreh se nuk beson se ky bllokim do të qëndrojë.“Unë nuk dua t’i futem kësaj polemike. Sinqerisht nuk besoj se ky bllokim do të qëndrojë, sepse nuk do të ishte serioze. Nga ana tjetër, është vetëm çështje e drejtësisë. Nëse shikoni raportin e progresit, Shqipëria vlerësohet vërtet mirë për çështjet e reformës në drejtësi. Unë jam shumë i kënaqur, sepse Shqipëria është vendi më i përparuar në të gjithë Ballkanin për këto çështje. Me Athinën kemi marrëdhënie strategjike. Nga ana tjetër, kur flisni për minoritet grek, dua të saktësoj sikurse e thatë, kandidati ishte shqiptar me origjinë greke, edhe kundërshtari i tij në zgjedhje ishte po ashtu shqiptar me origjinë greke. Atëherë s’mund të jetë një çështje minoriteti grek kjo”, tha ai.  Rama theksoi se progresraporti i KE-së për Shqipërinë në përgjithësi është shumë pozitiv.“Shënon me objektivitet të gjithë progresin që kemi arritur, por shënon gjithashtu gjithçka që duhet të vazhdojmë të bëjmë, sepse nuk jemi ende në fund të rrugës”, u shpreh ai. I pyetur mbi ndikimin që kanë zhvillimet Kosovë-Serbi në integrimin europian të rajonit, Rama tha se BE nuk duhet që të përjashtojë disa vende të rajonit. “Nga pikëpamja gjeopolitike do të ishte vetëvrasje për Bashkimin Evropian nëse do të përjashtonte rajonin apo disa vende. Duhet të bëjë të kundërtën e kësaj, duhet të përfshijë dhe të bashkojë sepse është mënyra e vetme për të arritur paqen përfundimtare në rajon. Po, ka herë pas here probleme, ka goditje dhe kthime pas, por kuadri i përgjithshëm i rajonit është shumë më i mirë se sa para 10 vjetësh”, tha ai.