Rama “zbut zërin” me BE: Samiti i sotëm, një moment fantastik për Shqipërinë dhe rajonin, do të sjellë më shumë shpresë dhe rrugë të reja për të ardhmen tonë

Kryeministri Edi Rama është shfaqur optimist dhe i kënaqur me faktin se drejtuesit e Bashkimit Europian pranuan që të mbajnë samitin BE-Ballkani Perëndimor sot në Tiranë. Në një intervistë për median prestigjioze ”Associated Press”, Rama, ndryshe nga herët e tjera ku ka kritikuar BE për mosdhënien e vaksinave anti-COVID, këtë herë e ka cilësuar samitin në Tiranë si moment fantastik. “Momenti është fantastik. Askush nuk mund ta imagjinonte dy vjet më parë dhe tani po ndodh. Vendimi i BE-së për të mbajtur samitin jashtë territorit të saj është një ogur i mirë për të ardhmen”, thotë fillimisht kryeministri. Lidhur me vonesat për integrimin e Ballkanit Perëndimor në BE, Rama çmoi unifikimin e 6 shteteve të rajonit për të nxitur BE që të ketë më tepër besim për ecurinë e tyre në procesin e integrimit. Ai shtoi se Brukselit i duhet integrimi i Ballkanit Perëndimor dhe anasjelltas. “Zëri i përbashkët i Ballkanit Perëndimor ndihmoi të shtyjnë më shumë liderë të BE-së për të çuar vendet në rrugën e anëtarësimit, sepse iu duhet Ballkani Perëndimor po aq sa Ballkani Perëndimor ka nevojë për BE-në”, tha Rama për ecurinë e procesit të integrimit të rajonit në BE. Ky aktivitet, sipas shefit të qeverisë, do të sjellë më tepër rrugë, shpresë dhe hapësirë optimiste për Shqipërinë dhe rajonin ku bëjmë pjesë. “Samiti do të sjellë shumë për Ballkanin Perëndimor, për vendin tonë, shumë energji pozitive, shumë shpresë, shumë rrugë të reja, shtigje të reja, të cilat do të përcaktohen në hapat e ardhshëm”, përfundoi Edi Rama për “Associated Press”.