Rexhep Meidani provokon mazhorancën, propozon që policia dhe garda të kalojnë në varësi të dyshes Berisha-Nishani

Ish-presidenti i zgjedhur nga socialistët, Rexhep Meidani, ka akuzuar dje rëndë mazhorancën qeverisëse. Disa ditë pasi kërkoi largimin e kryeministrit Edi Rama, Meidani propozoi dje që Policia e Shtetit dhe Garda e Republikës të kalonin në varësi të Bujar Nishanit, përkatësisht në duart e Sali Berishës. Pasi bëri lojën e Sali Berishës para zgjedhjeve të 23 Qershorit, Mejdani propozoi që Policia e Shtetit dhe Garda e Republikës duhet të kalojnë në duart e Sali Berishës, pasi sipas tij, në këtë mënyrë këto institucione bëhen të pavarura. Askush nuk e kishte imagjinuar që ish-presidenti i zgjedhur nga socialistë do të degradonte deri në këtë shkallë. 

 

Meidani e ka cilësuar si domosdoshmëri ndërhyrjet në Kushtetutë për të rregulluar një dualizëm, që sipas tij vihet re ndërmjet Këshillit të Sigurisë Kombëtare që drejtohet nga Presidenti dhe Komitetit të Politikës së Sigurisë Kombëtare që drejtohet nga Kryeministri. “Në fushën e sigurisë duhet të rritet edhe roli i Presidentit jo vetëm për Komandantin e Gardës por edhe për Drejtorin e Përgjithshëm të Policisë për t’i dhënë një karakter neutral këtij institucioni”, theksoi Meidani. Lidhur me rolin e Parlamentit në sistemin vendimmarrës të Sigurisë Kombëtare, ish-presidenti deklaron se ky reformim është i nevojshëm dhe sipas tij, duhet të gjendet një praktikë që mirëpërcakton detyrat duke shmangur përplasjet institucionale. Lidhur me këtë çështje, Meidani ka propozuar tre variantet e tij. “Në kushtet e një Republike Parlamentare, në gjykimin tim, të tre varantet, ai i paketës, ai i konceptimit vendimmarrës nën drejtimin e Kryeministrit duke lënë mënjanë Presidentin e Republikës, dhe varianti i tretë i ruajtjes pranë Presidentit të Republikës por me një staf më të fuqishëm pranë institucionit të Presidentit por, pa efektet vendimmarrëse. Sidoqoftë, edhe kjo mund t’i shërbejë funksionimit të detyrave të institucionit të Presidentit në fushat e sigurisë”, deklaroi Meidani. 

 

Kryetari i Komisionit të Sigurisë, Spartak Braho, i pranishëm në Konferencën për Sigurinë Kombëtare, ka vënë theksin te ndryshimet ligjore për ndarjen e kompetencave të Presidentit dhe ekzekutivit. Braho deklaroi se ka mungesë të ndjeshme të kontrollit Parlamentar mbi institucionet e sigurisë në vend. Sipas Brahos, Shërbimi Informativ Shtetëror është jashtë kontrollit. “Ka munguar analiza Parlamentare për të vlerësuar institucionet përgjegjëse nëse i përmbushin detyrimet që burojnë nga politikat e miratuara të Sigurisë, nga Kushtetuta, nga ligjet të cilat kanë qenë kosto e politikave të ndërmarra”, deklaroi Braho. Joana Tafa