“Rithemelimi” i akuzoi se po përdorin skemën ekonomike për vota, reagon Bashkia e Vaut të Dejës: Shpifje nga ‘Foltorja’ që s’ka opozitë

Pas akuzave të ‘Rithemelimit, Bashkia e Vaut të Dejës e ka mohuar se po përdor skemën ekonomike për blerje votash. Në një reagim të gjatë Amela Memaj, zëdhënësja e Bashkisë deklaroi dje se kjo është një shpifje e opozitës, që në këto zgjedhje vendore vjen pa i de e pa program sipas tyre, por vetëm me akuza të pavërteta kundrejt kundërshtarit. “Për ne në Bashkinë e Vau Dejës ndihmë ekonomike për njerëz që janë shëndoshë e mirë dhe të cilëve u ofrohet punësim, nuk kemi për të dhënë. Ndihma ekonomike është për njerëz, të cilët plotësojnë kriteret dhe nuk kanë për momentin asnjë mundësi punësimi. Kështu që, në gjithë këtë teatër të madh me të varfrit ka një dallim shumë të qartë. Ju i doni të varfrit si mish për top, për të dalë në fotografi, për të mbajtur fjalime me ata në krah, ndërkohë që varfëria e tyre është një status, të cilin e konsoliduat me qeverisjen tuaj të mbrapshtë. Ndërkohë ne, varfërinë duam dhe do ta luftojmë me reforma, jo me lëmosha. Është shumë e thjeshtë, është shumë e qartë që skema e ndihmës ekonomike e bën të pamundur që të vidhet, të abuzohet dhe që ata që nuk e meritojnë, të marrin bukën e atyre që kanë nevojë për bukë”, thuhet ndër të tjera në reagim. Më tej ajo theksoi se kjo bashki nuk ka abuzuar me këtë skemë. “Përgjigja jonë është si më poshtë! Bashkia e Vau Dejës nuk ka abuzuar, përjashtuar, apo larguar asnjë familjar , apo familje nga skema ekonomike për sa kohë plotëson kushtet e pikëzimit. Ka një ligj që detyron shërbimin e punësimit që detyron këdo që është i aftë për punë. Kush është i aftë për punë i ofrohet një punë dhe refuzon atë punë nuk meriton asnjë cent nga kontributet e përbashkëta të qytetarëve. Po ju nuk doni t’i dini këto. Ju ka mbetur ora te skema e vjetër, e cila ishte fund e krye në duart e partisë , në duart e kryetarëve të komunave e të bashkive, në duart e këshillave, ku i jepnin ndihmë ekonomike vetvetes. Këtë ju a kemi faktuar dhe ju a faktojmë sa herë të doni. Lotët e krokodilit që derdhni sot, për familjet e Vaut të Dejës nuk ua beson më njeri ”, përfundon deklarata.