Sandër Lleshaj flet për megaoperacionin “Tempulli”: Si t’i presësh thonjtë krimit, të arrestuarit zëvendësohen brenda ditës

Ish-ministri i Brendshëm Sandër Lleshaj u shpreh ditën e djeshme se megaoperacioni ‘Tempulli’ ka goditur hallkën e fundit të zinxhirit të drogës dhe se personat e arrestuar zëvendësohen menjëherë. Lleshaj tha se ky operacion është si t’i presësh thonj krimit. Lleshaj përgëzoi policinë, por theksoi se ky nuk është një rezultat final, që të na çojë në një rezultat të prekshëm dhe të fortë. Sipas ish-ministrit Shqipëria ka nevojë që të goditen financat e krimit. E përshëndes policinë për operacionin tregon një vullnet të policisë për ta goditur krimin. Kjo është hallka e fundit e zinxhirit, është hallka e rrugës e cila zëvendësohet brenda ditës, janë ushtar që zëvendësohen. Policisë i kam pas thënë se të bësh goditje në këtë nivel është t'i presësh thonjtë krimit. Duhet të pritet koka nëse flasim me metafora. Është e rëndësishme dhe meriton përgëzim dhe inkurajim. Nuk është një rezultat final, që meriton komplimente ekstreme, është periferike e goditjes. Duhet të nxjerrim mësime, duhet të na japë dhe një mesazh tjetër. Janë dhe konsumatorët. Kemi një përhapje të madhe të konsumimit të drogës. Shqipëria ka nevojë për goditjen  financave të krimit. Targeti numër 1 i policisë duhet të jetë të goditen financat e krimit. Do fusim 200 në burg sot, por gjatë kohës që këta janë në burg do të aktivizohen të tjerë jashtë.’- tha Lleshaj. Të njëjtin mendim si Lleshaj ndau dhe gazetari Lorenc Vangjeli. “Ajo që bënte përshtypje ishte numri shumë i madh i të arrestuarve. Shumica e tyre janë shpërndarës, janë hallka e parafundit e zinxhirit që përfundon tek përdoruesi. Arritje e policisë është në vetvete sepse në harkun e pak orëve është e vështirë që të mobilizosh një polici kaq të madhe dhe të bësh kaq shumë arrestime. Nga ana operacionale është si një lloj parade që demonstron dhe forcë dhe aftësinë e policisë nëse dëshiron të godasë krimin. Ky numër i lartë të arrestuarish janë hallka e fundit e zinxhirit të shpërndarësit të drogës. Është shumë herë më dobi prurëse dhe më e lehtë të mbërrihet në majë të piramidës sesa të prishësh bazën e saj”, tha ai i ftuar në një studio televizive.