SHBA i dhuron Shqipërisë 300 mijë dollarë pajisje për kontrollin dhe parandalimin e përmbytjeve, ambasadorja Kim jep mesazhin e fortë

SHBA i ka dhuruar Shqipërisë pajisje për kontrollin dhe parandalimin e përmbytjeve me 300,000 dollarë që do t’u vijnë në ndihmë punonjësve në vijën e parë për të kontrolluar përmbytjet në zonat më të prekura, si dhe për të vendosur nën kontroll situatat e emergjencës.

Ambasadorja Kim ka qenë e pranishme në këtë event me ministrin Niko Peleshi dhe shprehet se Shqipëria është aleat që qëndron krah për krah me SHBA.

 “Si miq, partnerë dhe aleatë të NATO-s, amerikanët dhe shqiptarët kanë qenë në krah të njëri-tjetrit, veçanërisht në kohë të vështira, si sot. Ky dhurim i fundit i pajisjeve vjen në një kohë kritike dhe ne jemi të lumtur që artikujt e dhuruar sot do të vihen menjëherë në përdorim për të ndihmuar njerëzit në nevojë. Kjo është ajo që aleatët bëjnë për njëri-tjetrin – ata qëndrojnë gati për të ndihmuar kur kjo u kërkohet.” Ambasadorja Yuri Kim, gjatë pjesëmarrjes në ceremoninë e sotme për dhurimin e pajisjeve për menaxhimin e përmbytjeve Ministrisë Shqiptare së Mbrojtjes, përkrah Ministrit të Mbrojtjes Niko Peleshi.

Këto pajisje për kontrollin dhe parandalimin e përmbytjeve, të vlerës 300,000 dollarë, u dhuruan nga Komanda Europiane e Shteteve të Bashkuara (EUCOM) dhe do t’u vijnë në ndihmë punonjësve në vijën e parë për të kontrolluar përmbytjet në zonat më të prekura, si dhe për të vendosur nën kontroll situatat e emergjencës.Që prej vitit 1999, Komanda Evropiane e Shteteve të Bashkuara ka siguruar mbi 13 milionë dollarë ndihmë humanitare për Shqipërinë.”-thuhet në njoftimin e publikuar nga ambasada e SHBA-së në Tiranë.