SHBA prish planet e presidentit për të zaptuar Kushtetuesen, Yuri Kim vizitë blic në Gjykatën e Lartë para zgjedhjes së emrave të rinj

Ambasadorja e SHBA në Shqipëri Yuri Kim është takuar ditën e djeshme me kryetarin e Gjykatës së Lartë Sokol Sadushi. Ambasadorja ka reaguar përmes një postimi në rrjetet sociale mbi detajet e takimit, ku u shpreh se është folur edhe për të futur në sistem njerëz sa më të kualifikuar. “Takimi produktiv me Sokol Sadushi, Kryetar i Gjykatës së Lartë. Numri i prapambetur po reduktohet, por ne ramë dakord se duhet të përshpejtojmë, SHBA-të do të ofrojnë ndihmë teknike. Gjithashtu u diskutuan hapat e ardhshëm për futjen e gjyqtarëve të kualifikuar në sistem, ndërsa vetingu vazhdon”, deklaroi Yuri Kim. Por çfarë ka dashur të thotë ambasadorja me frazën e futjes së gjyqtarëve të kualifikuar në sistem? Sinjalet janë se mesazhi i saj ka të bëjë me emërimet në Gjykatën Kushtetuese. Në Gjykatën e Lartë emërimet i bën Këshilli i Lartë Gjyqësor, ndërsa Gjykata e Lartë të vetmit gjyqtarë që emëron janë 3 në Gjykatën Kushtetuese. Pra duket se takimi është fokusuar te kjo pjesë, për faktin tjetër se Gjykata e Lartë ka në dorë 4 kandidatë për vendin e Fatmir Hoxhës në Kushtetuese. KED në fund të vitit që lamë pas kualifikoi 4 emra dhe i dërgoi te institucioni i emërtesës. Gazeta e denoncoi javë më parë se plani ishte që Gjykata e Lartë të mos bënte votim, por të emërohej automatikisht personi i parë në renditje. Bëhet fjalë për një person që gëzon simpatinë e presidentit. Por situata ka ndryshuar dhe Gjykata e Lartë njoftoi se do të presë sapo të plotësohet me 10 anëtarë që të bëjë votimin. Prania dje e Yuri Kim në gjykatë duket një sinjal se amerikanët nuk do të lejojnë që presidenti, apo politika në përgjithësi të kapë kandidatët që shkojnë në Kushtetuese.

Procedurat

Në Kushtetuese janë 3 vend vakante që duhet të plotësohen nga Gjykata e Lartë. KED mbylli procesin për vendin e lënë bosh nga Fatmir Hoxha dhe i dërgoi gjykatës emrat: Alket Jaupi, Sandër Beci, Ervin Karamuço dhe Albert Demirneli. Plani i presidentit dhe njerëzve të tij në KED ishte që Gjykata e Lartë të mos shprehej dhe pas 30 ditësh të bëhej emërimi i emrit të renditur i pari. Kjo sepse ligji kërkon që Gjykata e Lartë të ketë 10 anëtarë që të marrë vendim, ndërkohë që ajo ka 9. Në datën 26 janar kryetari në detyrë i Gjykatës së Lartë, ka thirrur mbledhjen e përgjithshme të gjyqtarëve të Gjykatës së Lartë dhe u vendos që të pritet emërimi i anëtarit të dhjetë. Gjykata e Lartë sqaroi se ndryshe nga sa ndodh me Presidentin dhe Kuvendin, nuk ka afat 30 ditor për Gjykatën e Lartë dhe do pritet plotësimi i saj. Për këtë arsye ju bë dhe një apel Këshillit të Lartë Gjyqësor që të nxitojë me emërimin e anëtarit të radhës në Gjykatën e Lartë. “Në kushtet kur, Gjykata e Lartë ka në përbërje të saj 9 gjyqtarë nga numri i përgjithshëm prej 19 gjyqtarësh, ndërkohë që sipas ligjit nevojiten të paktën 10 gjyqtarë për të konsideruar të vlefshme mbledhjen e posaçme për zgjedhjen e gjyqtarëve të Gjykatës Kushtetuese; me angazhimin, gatishmërinë, por dhe me përgjegjësinë e lartë për të përmbushur këtë kompetencë kushtetuese, mbeten në pritje të plotësimit pa vonesë nga Këshilli i Lartë Gjyqësor të numrit të nevojshëm të gjyqtarëve të Gjykatës së Lartë që bën të vlefshëm fillimin dhe përfundimin nga mbledhja e posaçme të procedurës për zgjedhjen e gjyqtarëve të Gjykatës Kushtetuese”, njoftoi Gjykata e Lartë.