Si do luftohet korrupsioni në Shqipëri? Ambasadorja Hohmann zbardh objektivat e BE-së

“Betejë e përditshme kundër korrupsionit”, kështu u shpreh ambasadorja e BE Christine Hohmann në intervistën e saj të parë pas emërimit në krye të diplomacisë europiane në Shqipëri.

Përballë pyetjeve të gazetares Erla Mëhilli në Euronews Albania, Hohmann u ndal edhe te raportet shqetësuese mbi korrupsionin në vend.

Ndër të tjera ajo adresoi edhe disa zgjidhje:

Erla Mëhilli: Zonja Ambasadore, Shqipëria sipas Transparency International renditet e fundit për sa i përket indeksit të perceptimit të korrupsionit. Në biseda me zyrtarë shqiptarë, çfarë ju thonë kur ju e ngrini këtë si shqetësim?

Ambasadorja: Duhen dy vetë për të bërë korrupsion, ai që kërkon nga njëra anë dhe ai që paguan në tjetrën. Si mund ta ndërpresim këtë qark? Kjo është një përpjekje e përbashkët, kjo nuk mund të bëhet vetëm me ligje, por edhe një ndryshim i rutinës së përditshme, është realiteti që duhet ndryshuar. Të dyja palët duhet të thonë jo, pra pala që kërkon të korruptohet të mos e bëjë më, por duhet të ketë edhe njerëz që thonë, jo, nuk paguaj për këtë, pasi e kam këtë të drejtë. Është e thjeshtë? Jo, nuk është dhe duhen vite për ta ndërprerë, por pa filluar nga diku, nuk do të arrijmë gjë. Kjo është gjëja më e rëndësishme për mua.

Erla Mëhilli: Duket betejë e vështirë kjo, zonja Ambasadore.

Ambasadorja: Ashtu është, një betejë e përditshme.