Skandali “McGonigal”/ “Foltorja” dhe PD zyrtare, “betejë” dhe në Kuvend, 11 deputetë të Berishës kërkojnë mocion me debat pa kufizim kohe me Ramën

Pasi javën e kaluar, mazhoraca socialiste rrëzoi kërkesën e “Foltores” për ndryshim rendi dite të seancës plenare për interpelancë me kryeministrin Edi Rama për skandalin “McGonigal”, sërish deputetët e Grupit të Rithemelimit kanë paraqitur një kërkesë me objekt të njëjtë. Ata i kanë dorëzuar Kryesisë së Kuvendit kërkesën për mocion me debat të hapur me shefin e mazhorancës Edi Rama. Kjo kërkesë është firmosur nga 11 deputetë të grupit të drejtuar nga Sali Berisha: Luçiano Boçi, Sorina Koti, Luan Baçi, Isuf Çelaj, Kasem Mahmutaj, Albana Vokshi, Tritan Shehu, Ina Zhupa, Greta Bardeli, Kastriot Piroli dhe Agron Shehaj. Ndryshe nga kërkesa e Enkelejd Alibeajt për mocion me debat, e cila u pranua këtë javë nga Konferenca e Kryetarëve, demokratët e “Foltores” kërkojnë që debati të bëhet pa kufizim kohor, për t’i dhënë mundësinë çdo deputeti të opozitës të shënjestrojë Edi Ramën. “Ndryshimin e Rendit të Ditës të seancës të datës 02.02.2023, ora 10:00; 2. Në përputhje me pikën 1, përfshirjen si e parë të Rendit të Ditës të një Mocioni me Debat për çështjen e sipërme; 3. Kërkojmë që Debati të mos ketë limit kohor, duke i dhënë mundësinë çdo deputeti të shprehet”, thuhet në kërkesën e 11 deputetëve të “Foltores”. Nga ana tjetër, PD zyrtare e drejtuar nga Enkelejd Alibeaj ka paraqitur kërkesën për nisjen e procedurës së shkarkimit të kryeparlamentares Lindita Nikolla, e cila përjashtoi 5 deputetë demokratë të “Foltores” pasi bllokuan punimet e Kuvendit. Megjithatë, duket se socialistët do të rrëzojnë sërish dy kërkesat e fundit, duke patur parasysh deklaratat e kryetari të grupit parlamentar të partisë në pushtet, Taulant Balla.